महाराष्ट्र संवाद न्यूज
संगमनेर – काँग्रेसचे विधिमंडळ पक्षनेते माजी मंत्री आमदार बाळासाहेब थोरात यांच्या वाढदिवसानिमित्त ४ ते ७ फेब्रुवारी दरम्यान दररोज खासदार डॉ. अमोल कोल्हे यांची प्रमुख भूमिका असलेले “शिवपुत्र संभाजी” हे महानाट्य संगमनेरकरांना बघावयास मिळणार आहे.
येथील जाणता राजा मैदानावर दररोज संध्याकाळी सहा वाजता या महानाट्याचे प्रयोग होणार असून या महानाट्याचे प्रयोग संगमनेरकरांना मोफत बघावयास मिळणार आहे. या महानाट्याची जाणता राजा मैदानावर जय्यत तयारी सुरू आहे.
या भव्य दिव्य महानाट्यात खासदार डॉ. अमोल कोल्हे हे संभाजी महाराजांच्या मुख्य भूमिकेत असून महाराणी येसूबाईच्या भूमिकेत स्नेहलता वसईकर, अनाजी पंतांच्या भूमिकेत महेश कोकाटे, कवी कलशांच्या भूमिकेत अजय तपकिरे, सेनापती हंबीररावच्या भूमिकेत रमेश रोकडे तर दिलेरखान आणि मुकर्रबखानाच्या दुहेरी भूमिकेत विश्वजीत फडतेंसोबत अनेक सिनेकलावंतांचा सहभाग यात असणार आहे.
तडाखेबाज संवाद, १२० फुटी भव्यदिव्य किल्ल्याचा रंगमंच, खरी खुरी लढाई, हत्ती, घोडे आणि बैलगाड्यांचा वापर, २६ फुटी जहाजावरून जंजिरा मोहीम, चित्तथरारक घोडेस्वारी, संपूर्ण मैदानाचा रंगमंच म्हणून वापर सोबत १५० पेक्षा जास्त कलाकार सहभागी होणार आहेत.
निळवंडे धरण व कालव्याचे निर्माते काँग्रेस पक्षाचे वरिष्ठ नेते आमदार थोरात यांनी राज्य मंत्रिमंडळात महसूल, कृषी, शालेय शिक्षण, पाटबंधारे, राज शिष्टाचार, जलसंधारण असे विविध महत्त्वाचे खाते भूषवले असून या सर्व खात्यांना लोकाभिमुख बनवले. याचबरोबर काँग्रेसचे प्रदेशाध्यक्ष, वर्किंग कमिटीचे सदस्य, विधिमंडळ पक्षनेते या जबाबदाऱ्या यशस्वीरित्या सांभाळताना संगमनेर तालुक्याला विकासाचे मॉडेल बनवले आहे.
दुष्काळी भागासाठी निळवंडे धरण व कालवे पूर्ण करून दुष्काळी भागाला पाणी दिल्याने ते महाराष्ट्राचे खरे जलनायक ठरले आहे. अत्यंत साध्या पद्धतीने आमदार थोरात यांनी कायम वाढदिवस केला असून यावर्षी लोकनेते बाळासाहेब थोरात मित्र मंडळाच्यावतीने या महानाट्याचे आयोजन करण्यात आले आहे.
महानाट्य बघण्यासाठी गटवर आणि वॉर्डनिहाय नियोजन…
४ फेब्रुवारी – जिल्हा परिषद घुलेवाडी व साकुर गट, संगमनेर शहरातील प्रभाग क्रमांक १, २, व ५.
५ फेब्रुवारी – जिल्हा परिषद वडगाव पान व संगमनेर खुर्द गट, शहरातील प्रभाग क्रमांक ३, ४ व ६
६ फेब्रुवारी – जिल्हा परिषद आश्वी, जोर्वे व समनापुर गट, शहरातील प्रभाग क्रमांक ७, ८, ९ व १०.
७ फेब्रुवारी – जिल्हा परिषद धांदरफळ व बोटा गट, शहरातील प्रभाग क्रमांक ११, १२, १३ व १४. अशा पद्धतीचे नियोजन असून त्यासाठीचे पासेस उपलब्ध करून दिले जाणार आहेत.
