महाराष्ट्र संवाद न्यूज
सिन्नर (नाशिक) – शुक्रवारी दुपारी सिन्नर औद्योगिक वसाहतीतील आदिमा ऑरगॅनिक या केमिकल कंपनीला शुक्रवारी दुपारी लागलेल्या आगीत मोठे नुकसान झाले आहे. उशिरापर्यंत आग विझविण्यासाठी अग्निशामक बंबाच्या सहाय्याने शर्तीचे प्रयत्न सुरू होते.
सिन्नरच्या मुसळगाव एमआयडीसीत हा प्रकार घडला. दुपारी सव्वाचार वाजण्याच्या सुमारास अचानक लागलेल्या या भीषण आगीमुळे आकाशात सर्वदूर अनेक किलोमीटर पर्यंत आगीचे तसेच धुराचे लोळ दिसत होते. कंपनीमध्ये पंधरा ते वीस कामगार काम करत मात्र आग लागल्याचे दिसताच ते बाहेर आल्याने मोठा अनर्थ टळला. आगीमुळे स्फोटाचे आवाजही येत असल्याचे नागरिकांनी सांगितले. यामुळे एमआयडीसी परिसरात एकच घबराट उडाली. आगीचे नेमके कारण उशिरापर्यंत स्पष्ट झाले नाही.
दरम्यान आगीची माहिती मिळताच घटनास्थळी सिन्नर तालुका औद्योगिक वसाहतीचे कर्मचाऱ्यांसह सिन्नर नगर परिषदेचे आणि नाशिक तसेच माळेगाव येथील अग्निशामक बंब दाखल झाले होते. तसेच सिन्नर तालुका सहकारी औद्योगिक वसाहतीचे अध्यक्ष नामकरण आवारे व्यवस्थापक कमलाकर पोटे एमआयडीसीचे पोलीस निरीक्षक यशवंत बाविस्कर तातडीने घटनास्थळी दाखल झाले होते. नागरिकांनी देखील यावेळी मोठी गर्दी केली होती.
