शहर, तालुक्यातील अवैध धंदे बंद करण्याच्या मागणीसाठी नाशकात आयजी कार्यालयासमोर शिवसेनेचे (उबाठा) माजी शहरप्रमुख करणार आंदोलन…

संगमनेर, दि. २
संगमनेर शहर व तालुका हद्दीतील सर्वच प्रकारचे अवैध धंदे ५ मार्चपर्यंत बंद न झाल्यास नाशिकला विशेष पोलीस महानिरीक्षकांच्या कार्यालयासमोर आंदोलन करण्याचा इशारा शिवसेना (ठाकरे) गटाचे माजी शहरप्रमुख तथा राज्य दारूबंदी कृती समितीचे जिल्हाध्यक्ष अमर कतारी यांनी दिला असून यासंबंधीचे निवेदन पोलीस उपाधीक्षकांना देण्यात आले आहे.
कतारी यांनी म्हटले आहे की, संगमनेर शहर व तालुक्याच्या हद्दीमध्ये दारू, मटका, जुगार अड्डे, गांजा विक्री आदी प्रकारचे अवैध धंदे मोठ्या प्रमाणात सुरू आहे. काही ढाबे व हॉटेलमध्येही मोठ्या प्रमाणात दारू विक्री सुरू आहे. परवानगी असलेल्या बार चालक, दारू विक्रेत्यांकडून रात्री बारा ते एक वाजेपर्यंत बेकायदेशीर रित्या दारू विक्री सुरू असते.
यापूर्वी संगमनेरमध्ये मटक्याचा मुख्य पेढ्यामार्फत ६० ते ७० ठिकाणी अवैधरित्या व्यवसाय सुरू होता आता यात तिसरा व्यक्ती सहभागी झाला असून या पेढी चालकांवर कारवाई करून त्या कायमस्वरूपी बंद कराव्यात. या व्यवसायामुळे संगमनेरमध्ये अनेक ठिकाणी वाद होत असतात.
संगमनेरमधील शांतता व सुव्यवस्था खराब होण्याचे हे एकमेव कारण असून यामुळे दोन धर्मियात दंगली होऊ शकतात. या मटका पेढ्या, अवैध जुगार अड्डे, गांजा विक्रीची ठिकाणे कुठे-कुठे आहेत. ते कोण चालवते, हे पोलिसांसह सर्वसामान्य नागरिकांनादेखील माहिती आहे. मात्र पोलीस खात्यातील काही भ्रष्ट कर्मचारी आपले आर्थिक संबंध जपण्यासाठी कर्तव्य टाळत आहे. त्यामुळे हे धंदे खुलेआम सुरू आहेत. संगमनेर मध्ये अधिकारी बदलून आला की सुरुवातीला काही दिवस हे अवैध धंदे बंद केले जातात व नंतर अधिकाऱ्यांच्या नावावर हप्ता गोळा केला जातो.
संबंधित वरिष्ठ पोलीस अधिकारी पोलीस निरीक्षक यांच्या बद्दल कोणतीही तक्रार नसून भ्रष्ट व दोषी कर्मचाऱ्यांनी अवैधधंदे करणाऱ्या व्यावसायिकांकडून ऑनलाईन पैसे घेतल्याचे स्क्रीन शॉट थेट नाशिकच्या आयजी कार्यालयात व लाच लुचपत विभागाला देण्यात येणार असल्याचे कतारी यांनी म्हटले आहे.
५ मार्चच्या आत हे सर्व धंदे बंद न झाल्यास पोलीस प्रशासनाला जाग आणण्यासाठी नाशिकच्या आयजी ऑफिससमोर आंदोलन करण्यात येणार असल्याचे व त्यात संगमनेरमधील शिवसैनिकांचा सहभाग राहणार असल्याचे कतारी यांनी म्हटले आहे.