नगर अर्बन बँक घोटाळा प्रकरणी संगमनेरमधील अमृतवाहिनी बँकेचे माजी अध्यक्ष अमित पंडित अटकेत!

दि. १६ मार्च, संगमनेर
नगर अर्बन बँकेतील अडीचशे कोटी रुपयांच्या घोटाळ्यातील मोठा कर्जदार व आरोपी असलेल्या संगमनेरमधील अमृतवाहिनी बँकेचा माजी अध्यक्ष व उद्योजक असलेल्या अमित वल्लभराय पंडित याला शनिवारी दुपारी संगमनेर पोलिसांनी अटक केली आहे. गेल्या अनेक अटकेला हुलकावणी देणाऱ्या असलेल्या पंडित याला अखेर नाट्यमयरित्या अटक झाल्याने ठेवीदार सुखावले असून सहकारात मात्र खळबळ उडाली आहे.
नगर अर्बन बँकेतील सर्वात मोठ्या घोटाळ्याचा तपास आर्थिक गुन्हे शाखा करत आहेत. काही आरोपी अटकेत असतानाच आता आर्थिक गुन्हे शाखेचे वक्रदृष्टी मोठ्या कर्जदारांवर देखील पडली आहे. या कर्जदारांना ताब्यात घेतल्यानंतर अनेक गोष्टी बाहेर येऊ लागल्या.
आता अमित पंडित याला अटक केल्याने त्याच्या चौकशीत काय निष्पन्न होते याकडे लक्ष लागले आहे. अर्बन बँकेने पंडित याला काही कोटीहून अधिक रुपयांचे कर्ज दिल्याचा व अशा कर्जबुडव्या कर्जदारांमुळे बँक डबघाईला आल्याचा बँक बचाव कृती समितीचा आरोप आहे. दुसरा एका मोठ्या बँकेचा ९ कोटी रुपयांचा थकबाकीदार असताना देखील त्याला बँकेने कर्ज देण्याचा प्रकार घडला होता. या कर्जाची मोठी थकबाकी झाली.
आर्थिक गुन्हे शाखेचे पोलीस गेल्या अनेक दिवसांपासून पंडित यांच्या मागावर होते. पंडित याच्यावर स्थानिक पोलिसांची देखील पाळत होती. मात्र पंडित याचे राजकीय संबंध पाहता तसेच पोलीस ठाण्यातील महत्वाची माहिती कारवाईपूर्वीच लीक होत असल्याने स्थानिक पोलीस पंडित याला अटक करतील का? याविषयी साशकता व्यक्त केली जात होती. मात्र शनिवारी दुपारी शहर पोलीस ठाण्याचे पोलीस निरीक्षक भगवान मथुरे यांनी पंडित याच्या घराची झाडाझडती घेत दुपारी घरातील वरच्या मजल्यावर दडून बसलेल्या पंडितला अटक केली.