दि. १९ मार्च, संगमनेर
संगमनेर तालुक्यातील पठार भागात असलेल्या साकुरमध्ये दहावी शिकणाऱ्या अल्पवयीन मुलीवर केलेल्या अत्याचारानंतर तिने बदनामीच्या भीतीने विषारी औषध सेवन करून आत्महत्या केल्याचा प्रकार समोर आला. या अमानुष अत्याचाराचा निषेध नोंदवत आरोपींवर कठोर शासन करण्याची मागणी जयहिंद महिला मंच व एकविरा फाउंडेशनच्यावतीने माजी नगराध्यक्ष दुर्गाताई तांबे व तालुका काँग्रेस अध्यक्ष जयश्रीताई थोरात यांनी केली आहे.
२९ फेब्रुवारीला घडलेल्या या घटने प्रकरणी सोमवारी तालुक्यातील घारगाव पोलीस ठाण्यात पाच आरोपीं विरोधात बाल लैंगिक अत्याचारासह (पोक्सो) विविध कलमांतर्गत गुन्हा दाखल करून तिघा आरोपींना अटक करण्यात आली आहे.
या आरोपींवर कठोर कारवाई करण्याची मागणी माजी नगराध्यक्ष व जय हिंद महिला मंचच्या प्रमुख दुर्गाताई तांबे, एकवीरा फाउंडेशनच्या संस्थापक अध्यक्ष व तालुका काँग्रेसचे अध्यक्ष जयश्रीताई थोरात यांनी देखील केली आहे.
अत्याचाराची घटना दुर्दैवी व निंदनीय असून यातील आरोपींना कठोरात कठोर शिक्षा व्हायला हवी, यासाठी पोलीस यंत्रणेने योग्य दिशेने तपास करावा. स्वतंत्र महिला पोलीस अधिकाऱ्याची तपास अधिकारी म्हणून नियुक्ती केली जावी. कोणत्याही आरोपींना न्यायालयात जामीन मिळता कामा सर्व आरोपींना अटक करावी. पीडितेच्या मृत्यूमुळे तिच्या कुटुंबीयांना संरक्षण दिले जावे. मनोधैर्य योजनेअंतर्गत तिच्या कुटुंबीयांना मदत मिळावी, अशी मागणी करत याप्रकरणी प्रांत अधिकाऱ्यांना जयहिंद महिला मंच व एकविरा फाउंडेशनच्या माध्यमातून निवेदन देण्यात येणार असल्याचे तांबे व थोरात यांनी म्हटले आहे.
