गुरुवार दि. २१ मार्च, संगमनेर
१० वर्ष वयाच्या मतिमंद असलेल्या अल्पवयीन मुलीचा विनयभंग करणाऱ्या दत्तू पंढरीनाथ डोळझाके (रा. हिवरगाव पठार, ता. संगमनेर) याला संगमनेरच्या जिल्हा न्यायालयाने पाच वर्षे सश्रम कारावास आणि २७,५०० रुपये दंडाचे शिक्षा सुनावली आहे.
२५ मे २०२२ रोजी पठार भागातील एका गावात घडलेल्या या प्रकारासंदर्भात घारगाव पोलीस ठाण्यात पीडित मुलीच्या मामाने दिलेल्या तक्रारीवरून भा. द. वि. कलम ३५४(अ), ३५४(ब), ३२३, पोस्को, अनुसूचित जाती जमाती कायद्यानुसार दत्तू पंढरीनाथ डोळझाके यांच्या विरोधात गुन्हा दाखल करण्यात आला होता. संगमनेरचे तत्कालीन पोलीस उपाधीक्षक राहुल मदने यांनी या गुन्ह्याचा तपास केला होता.
फिर्यादी व त्याच्या कुटुंबीय घरात असताना फिर्यादीची भाची दुपारी साडेतीन वाजण्याच्या सुमारास घराबाहेर गेली होती. बराच वेळ झाला तरी ती घरी न परतल्याने फिर्यादी आणि त्याच्या कुटुंबीयांनी भाचीचा शोध सुरू केला. पाच वाजण्याच्या सुमारास जवळच पाचशे-सातशे मीटर अंतरावर एका शेतात फिर्यादीची भाची तिच्या अंगावरील कपडे काढलेल्या अवस्थेत आरोपी समवेत दिसली. आरोपी तिच्यासोबत तिचा विनयभंग होईल अशा पद्धतीचे लज्जास्पद वर्तन करत होता. आरोपी मुलीच्या नातेवाईकांना बघून पळून जाऊ लागल्याने त्याला पकडून घटनास्थळी पोलिसांना बोलावून त्यांच्या ताब्यात देण्यात आले होते.
पोलीस उपाधीक्षक मदने यांनी गुन्ह्याचा तपास करून न्यायालयात आरोपी विरुद्ध आरोपपत्र दाखल केले. जिल्हा न्यायाधीश योगेश मनाठकर यांच्यासमोर या खटल्याची सुनावणी सुरू होती. सरकारी वकील संजय वाकचौरे यांनी फिर्यादी पक्षाच्या बाजूने काम बघितले. खटल्यात सात साक्षीदारांच्या साक्षी न्यायालयासमोर नोंदविण्यात आल्या होत्या. यात फिर्यादी, पीडित अल्पवयीन मुलगी आणि मतिमंद विद्यार्थी शिक्षक भाऊसाहेब नरवडे यांच्या साक्षी महत्त्वपूर्ण ठरल्या.
न्यायाधीश मनाठकर यांनी फिर्यादी व आरोपी या दोन्ही पक्षाचा युक्तिवाद ऐकल्यानंतर मंगळवारी या खटल्याचा निर्णय दिला. आरोपी दत्तू पंढरीनाथ डोळझाके याला विविध कलमांतर्गत दोषी ठरवत पाच वर्षे सश्रम कारावास व २७,५०० रुपये दंडाची शिक्षा ठोठावली. दंडाच्या रकमेतील वीस हजार रुपयांची रक्कम पीडित मुलीला भरपाई म्हणून देण्यात येणार आहे.
या खटल्यात सरकारी वकिलांना घारगाव पोलीस ठाण्याचे सहाय्यक फौजदार प्रवीण डावरे महिला पोलीस कॉन्स्टेबल स्वाती नायकवाडी, दिपाली रहाणे, नयना पंडित व प्रतिभा थोरात यांनी सहाय्य केले.
