शुक्रवार दि. २२ मार्च, संगमनेर
अल्पवयीन मुलीवर अत्याचार करून तिच्या आत्महत्या कारणीभूत ठरल्याप्रकरणी अटकेत असलेल्या तिघा आरोपींच्या पोलीस कोठडीत संगमनेरच्या जिल्हा न्यायालयाने २६ मार्चपर्यंत वाढ केली आहे. अद्यापही या गुन्ह्यातील एक आरोपी फरार असल्याचे पोलिसांनी न्यायालयाला सांगितले.
संगमनेर तालुक्यातील साकुर येथील रुबाब पान शॉपमध्ये दहावीत शिकणाऱ्या अल्पवयीन मुलीचे हातपाय बांधून सौरभ रावसाहेब खेमनर (रा. हिरेवाडी, साकुर) याने २९ फेब्रुवारीला सकाळी आठ ते साडेअकरा वाजण्याच्या दरम्यान अत्याचार केला होता. सौरभ खेमनर मुलीवर अत्याचार करत असताना त्याचा जोडीदार योगेश रामा खेमनर (रा. हिरेवाडी, साकुर) याने पान स्टॉलचे शटर बाहेरून बंद करून त्याला कुलूप लावून घेतले होते. तर त्यांचे आणखी दोघे मित्र प्रशांत भास्कर भडांगे (रा. भडांगे वस्ती, साकुर) व विजय खेमनर (रा. हिरेवाडी, साकुर) या दोघांनी बंद शटर बाहेर उभे राहून देखरेख ठेवत अत्याचारासाठी मदत केली. यावेळी येथे आलेल्या बाजीराव दातीर यास तू येथे का आलास इथून निघून जा, असे म्हणत दमबाजीदेखील केली होती. याशिवाय या गुन्ह्यामध्ये विकास रामदास गुंड (रा. गुंड वस्ती, साकुर) याचा देखील गुन्हा दाखल झालेल्या आरोपींमध्ये समावेश आहे. मात्र या घटनेतील त्याचा प्रत्यक्ष सहभाग काय आहे हे नेमके समोर आलेले नाही.
या घटनेनंतर पीडित मुलीने घरी गेल्यानंतर विषारी औषध सेवन करून आत्महत्या केली होती. २९ फेब्रुवारीला घडलेल्या या घटने प्रकरणी घारगाव पोलीस ठाण्यामध्ये १७ मार्चला पाचही आरोपी विरोधात गुन्हा दाखल करण्यात आला होता. त्यानंतर या गटांचे पडसाद सर्वत्र उमटले. विधान परिषदेच्या उपसभापती नीलम गोऱ्हे, महिला आयोगाच्या सदस्य उत्कर्षा रूपवते, तालुका काँग्रेस अध्यक्ष डॉ. जयश्री थोरात, चित्रा वाघ, पालकमंत्री राधाकृष्ण विखे पाटील आदींनी पीडित मुलीच्या कुटुंबीयांची भेट घेतली होती. याप्रकरणी समाजात मोठा जनक्षोभ निर्माण झाला आहे.
पोलिसांनी सौरभ खेमनर प्रशांत भडांगे व योगेश खेमनर या तिघांना अटक केली होती. त्यांच्या पोलीस कोठडीची मुदत संपल्यानंतर शुक्रवारी त्यांना पुन्हा न्यायालयासमोर उभे करण्यात आले होते. सहाय्यक सरकारी अभियोक्ता मच्छिंद्र गवते यांनी या संदर्भात समाजामध्ये मोठा जनक्षोभ निर्माण झाला असल्याचे न्यायालयाला सांगत आरोपींच्या पोलीस कोठडीत वाढ करण्याची मागणी केली. जिल्हा न्यायाधीश दिलीप घुमरे यांनी आरोपींच्या पोलीस कोठडीत २६ मार्चपर्यंत वाढ केली आहे.
