रविवार दि. २४ मार्च, संगमनेर
अनंत पांगारकर
तब्बल सात महिन्यांचा कालावधी उलटून गेला तरी दूधगंगा नागरी सहकारी पतसंस्थेतील व्हाईट कॉलर आरोपींपर्यंत पोलिस यंत्रणेला पोहोचण्यात अपयश आले आहे. राजकीयदृष्ट्या प्रतिष्ठित समजला जाणारा मुख्य आरोपी भाऊसाहेब कुटेसह जिल्हा न्यायालयाने अटकपूर्व जामीन नाकारलेल्या आरोपीपैकी एकही आरोपी नगरच्या आर्थिक गुन्हे शाखेच्या हाती लागलेला नाही. नगर अर्बन बँकेत एकापाठोपाठ आरोपींवर कारवाई करत ठेवीदारांना दिलासा देणारी आर्थिक गुन्हे शाखेची यंत्रणा दूधगंगा प्रकरणी मात्र राजकीय दबावाखाली देखील असल्याचे चर्चिले जात आहे. त्यामुळे गृहमंत्र्यांनी यात लक्ष घालण्याची आवश्यकता निर्माण झाली आहे.
या मोठ्या घोटाळ्यातील मुख्य आरोपीपैकी एक असलेला पतसंस्थेचा व्यवस्थापक भाऊसाहेब गुंजाळ हाच एकमेव आरोपी सध्या अटकेत असून आर्थिक गुन्हे शाखेने न्यायालयात आरोपपत्र दाखल केल्यानंतर त्यानेदेखील जामीन मिळण्यासाठी न्यायालयाकडे अर्ज केला आहे. गुंजाळ याच्यासह या गुन्ह्यातील कर्जदार आरोपी असलेले अजित कृष्णराव कदम व सुजित कृष्णराव कदम या दोघा आरोपींनी देखील जिल्हा न्यायालयात अटकपूर्व जामीनासाठी अर्ज केला असून या अर्जावरील सुनावणी व निर्णयाकडे ठेविदारांचे लक्ष लागले आहे.
अतिरिक्त सरकारी वकील मच्छिंद्र गवते यांनी या घटनेतील गांभीर्य न्यायालयाला पटवून देण्यात योग्य भूमिका बजावल्याने दूधगंगा पतसंस्थेतील ८१ कोटी रुपयांच्या अपहार प्रकरणातील मुख्य आरोपी असलेल्या अध्यक्ष भाऊसाहेब कुटेसह त्याच्या कुटुंबातील सर्वच आरोपी, औरंगाबाद येथील चेतन नागराज बाबा कपाटे महाराज, राहुरी येथील कृष्णराव कदम व प्रमिला कदम आदींचे अटकपूर्व जामीन संगमनेरच्या जिल्हा न्यायालयाने यापूर्वीच फेटाळलेले आहे. यातील काही जणांनी या निर्णयाविरोधात व अटकपूर्व जामीन मिळण्यासाठी औरंगाबाद उच्च न्यायालयात दाद मागितली आहे.
सहकारी संस्थेचे लेखापरीक्षक राजेंद्र फकीरा निकम यांच्या फिर्यादीनंतर संगमनेर शहर पोलीस ठाण्यात मुख्य आरोपी चेअरमन भाऊसाहेब कुटेसह २१ लोकांविरुद्ध संगमनेर शहर पोलीस ठाण्यात विविध कलमांतर्गत गुन्हा दाखल करण्यात आला आहे. यातील प्रमुख बहुतांश आरोपी हे १९ ऑगस्टपासून पोलिसांना सापडू शकलेले नाही. ठेवीदारांची मोठ्या प्रमाणावर फसवणूक करणाऱ्या या आर्थिक दरोडेखोरांना अटक करण्यात यावी, या मागणीसाठी ठेवीदारांनी उपोषणाचा देखील मार्ग सातत्याने अवलंबला. मात्र केवळ आश्वासना पलीकडे त्यांच्या पदरात अद्याप काही पडू शकलेले नाही.
डॉ. कुटेंची चौकशी करा !
दरम्यान मुख्य आरोपी भाऊसाहेब कुटे आणि त्याच्या कुटुंबीयांना अटकपूर्व जामीन मिळावा यासाठी सातत्याने न्यायालयात व अन्य ठिकाणी धावपळ करणाऱ्या डॉ. प्रदीप कुटे यांच्याकडे तपास यंत्रणेने आरोपी संदर्भात सखोल चौकशी करण्याची प्रसंगी त्यांना ताब्यात घेण्याची मागणी उपोषणादरम्यान ठेवीदारांनी तपास अधिकाऱ्यांकडे केली आहे. एरव्ही एखाद्या गुन्ह्यात मुख्य आरोपींपर्यंत पोहोचण्यासाठी नातेवाईकांना जेरीस आणणाऱ्या पोलीस यंत्रणेने डॉ. कुटे यांची सखोल चौकशी केल्यास यातून आरोपींसंदर्भात माहिती समोर येऊ शकते? मात्र असे होताना दिसत नाही. ठेवीदारांची मोठ्या प्रमाणात फसवणूक झाल्याने तपास यंत्रणेने यादृष्टीने देखील तपास करण्याची आवश्यकता व्यक्त होत आहे.
