दूधगंगा पतसंस्थेतील आर्थिक अपहार प्रकरणात भाऊसाहेब कुटेच्या या नातेवाईक आरोपींनाही जिल्हा न्यायालयाचा दिलासा नाहीच; आता तरी आर्थिक गुन्हे शाखा आरोपींना जेलमध्ये घालणार का?

बुधवार दि. २७ मार्च, संगमनेर

चेअरमन भाऊसाहेब कुटेसह त्याच्या नातेवाईकांनी तब्बल ८१ कोटी रुपयांचा आर्थिक घोटाळा केलेल्या बहुचर्चित दूधगंगा नागरी सहकारी पतसंस्थेची मोठी अपडेट समोर आली आहे. मोठ्या आर्थिक गुन्ह्यातील आरोपींना अटकपूर्व जामीन नाकारण्याचा जिल्हा न्यायालयाचा सिलसिला कायम राहिला आहे.

या घोटाळ्यातील चेअरमन भाऊसाहेब कुटे याचे नातेवाईक असलेले कर्जदार आरोपी अजित कृष्णराव कदम व सुजित कृष्णराव कदम या दोघांचा अटकपूर्व जामीन संगमनेरच्या जिल्हा व सत्र न्यायालयाने मंगळवारी नाकारला आहे. ऑगस्ट २०२३ पासून पोलिसांना गुंगारा देणारे आणि राजकीय दृष्ट्या प्रतिष्ठित असलेल्या, समाजात व्हाईट कॉलर म्हणून मिरविणाऱ्या या गुन्हेगारांना न्यायालयाने बेल नाकारल्याने आता आर्थिक गुन्हे शाखा त्यांना पकडून जेलमध्ये टाकणार का? असा प्रश्न उपस्थित झाला आहे.

या आर्थिक गुन्ह्यातील प्रमुख आरोपी असलेल्या पतसंस्थेचा अध्यक्ष भाऊसाहेब कुटेसह त्याच्या कुटुंबातील सर्वच आरोपी, औरंगाबाद येथील चेतन नागराज बाबा कपाटे महाराज, राहुरी येथील कृष्णराव कदम व प्रमिला कदम आदींचे अटकपूर्व जामीन संगमनेरच्या जिल्हा न्यायालयाने यापूर्वीच फेटाळलेले आहे. त्या पाठोपाठ आता न्यायालयाने अजित कृष्णराव कदम व सुजित कृष्णराव कदम या दोघांचा अटकपूर्व जामीन अर्ज फेटाळून लावला आहे.

ऑगस्ट २०२३ पासून या गुन्ह्यातील सर्वच प्रमुख आरोपी बाहेर असताना आर्थिक गुन्हे शाखा या आरोपींना अटक करण्याचे धाडस का दाखवत नाही, यामागे कोणता राजकीय दबाव तर नाही ना असा देखील प्रश्न ठेवीदारांमधून तसेच सहकारातील जाणकारांमधून उपस्थित होत आहे.

अजित कदम व सुजित कदम यांनी संगमनेरच्या जिल्हा व सत्र न्यायालयात अटकपूर्व जामीन मिळण्यासाठी अर्ज दाखल केला होता. या अर्जावर न्यायाधीश योगेश मनाठकर यांच्यासमोर सुनावणी झाली. आरोपींच्यावतीने ॲड. व्ही. के. तनपुरे यांनी युक्तिवाद केला. सहाय्यक सरकारी अभियोक्ता मच्छिंद्र गवते यांनी या आर्थिक गुन्ह्याचे स्वरूप लक्षात घेता जामीन नाकारणे का महत्त्वाचे आहे, हे न्यायालयाच्या निदर्शनास आणून दिले. त्यांचा व्यक्तिवाद ग्राह्य धरत न्यायालयाने दोन्ही आरोपींचा जामीन अर्ज फेटाळून लावला. एकापाठोपाठ एक करत बहुतांशी आरोपींचे अटकपूर्व जामीन अर्ज फेटाळले गेल्याने ठेवीदारांना दिलासा मिळाला असला तरी देखील आरोपींना अटक होत नसल्याने त्यांच्या ठेवी परत कधी मिळणार असा प्रश्न या निमित्ताने उपस्थित झाला आहे.