बुधवार, दि.१७ एप्रिल
शिर्डी लोकसभा मतदारसंघातून महाविकास आघाडी कडून उमेदवारी करण्यासाठी इच्छुक असलेल्या राज्य महिला आयोगाच्या सदस्य उत्कर्षा रुपवते यांनी बुधवारी महाराष्ट्र प्रदेश काँग्रेस कमिटीच्या महासचिव पदाचा व अखिल भारतीय राष्ट्रीय काँग्रेस पक्षाच्या प्राथमिक सदस्यत्वासह सर्व पदांचा राजीनामा दिला आहे. काँग्रेस पक्षासाठी हा मोठा धक्का मानला जात आहे.
रूपवते यांनी काँग्रेस अध्यक्ष मल्लिकार्जुन खरगे यांना आपल्या राजीनामा पाठविला आहे. रुपवते-चौधरी कुटुंबातील तिसरी पिढी काँग्रेस पक्षात कार्यरत असताना निस्वार्थीपणे अहोरात्र पक्षासाठी झटणाऱ्या माझ्यासारख्या युवा कार्यकर्तीला पक्ष सोडण्याचा निर्णय का घ्यावा लागतो याबद्दल पक्ष नेतृत्वाने विचार करण्याची गरज त्यांनी आपल्या राजीनामा पत्रात व्यक्त केली आहे.
काँग्रेसच्या महासचिव आणि राज्य महिला आयोगाच्या सदस्य असलेल्या उत्कर्षा रुपवते या काँग्रेसने ते आमदार बाळासाहेब थोरात यांच्या निकटवर्ती मानल्या जातात. यावेळी लोकसभा निवडणुकीसाठी त्या इच्छुक होत्या. त्या दृष्टीने त्यांचे पक्षाकडे प्रयत्न देखील सुरू होते, मात्र शिर्डीची जागा ठाकरे गटाकडे कायम राहिल्याने आणि ती जागा काँग्रेसच्या वाट्याला यावे यासाठी काँग्रेस श्रेष्ठीकडून कोणतेही प्रयत्न न झाल्यामुळे रुपवते नाराज होत्या. काँग्रेस पक्षासोबत एकनिष्ठ राहिलेल्या रुपवते कुटुंबीयांना काँग्रेसकडून वारंवार उमेदवारी नाकारली गेली आहे.
रुपवते आता वंचित बहुजन आघाडीच्या वाटेवर असल्याची चर्चा असून त्या वंचितमध्ये प्रवेश करतात की अपक्ष उमेदवारी दाखल करतात याकडे लक्ष लागले आहे. रुपवते यांना वंचितकडून उमेदवारी मिळाल्यास या मतदारसंघात निकराची तिरंगी लढत होण्याची शक्यता वर्तवली जात आहे.
