सोमवार, दि.२२ एप्रिल
अहमदनगर दक्षिण लोकसभा मतदार संघात महायुतीचे सुजय विखे यांच्यासह चार उमेदवारांनी सोमवारी आपल्या उमेदवारी अर्ज दाखल केले. सुजय विखे यांचा उमेदवारी अर्ज दाखल करतेवेळी राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, महसूल मंत्री राधाकृष्ण विखे पाटील उपस्थित होते.
विखे यांनी तीन उमेदवारी अर्ज दाखल केले असून विखे यांच्यासह महाराष्ट्र विकास आघाडीच्या वतीने डॉ. कैलाश निवृत्ती जाधव, समता पार्टीच्या वतीने भागवत धोंडीबा गायकवाड यांनी तर ॲड. महंमद जमीर शेख यांनी आपला अपक्ष उमेदवारी अर्ज दाखल केला असल्याची माहिती देण्यात आली.
याशिवाय सोमवारी पाच इच्छुकांनी बारा नामनिर्देशन पत्र नेले आहेत. गुरुवारी उमेदवारी अर्ज दाखल करण्याचा अखेरचा दिवस आहे. शुक्रवारी (२६ एप्रिल) दाखल नामनिर्देशन पत्राची छाननी करण्यात येणार असून सोमवारी (२९ एप्रिल) उमेदवारी अर्ज मागे घेण्याचा अखेरचा दिवस आहे.
जिल्ह्यातील अहमदनगर आणि शिर्डी या दोन्ही लोकसभा मतदारसंघात एकाच दिवशी १३ मेला मतदान होणार असून ४ जूनला मतमोजणी होणार आहे.
