मंगळवार, दि.२३ एप्रिल
नगर अर्बन बँक घोटाळा प्रकरणी संगमनेर मधील कर्जदार आरोपी उद्योजक अमित पंडित यांच्या न्यायालयीन कोठडीत सोमवारी ३ मेपर्यंत वाढ करण्यात आली आहे. तर पंडित याची पत्नी सपना, मुलगा सात्विक आणि भागीदार सत्येन्द्र कुमार रावत यांना मात्र तात्पुरता अटकपूर्व जामीन मंजूर करण्यात आला आहे.
नगर अर्बन २९१ कोटी रुपयांच्या घोटाळ्यातील बडा ३३ कोटी रुपयांचा कर्जदार म्हणून आरोपी पंडित याच्यासह त्याच्या कुटुंबीयांचा समावेश आहे. पंडित गेल्या काही दिवसांपासून अटकेत असून न्यायालयीन कोठडीत आहे. तर पंडितची पत्नी सपना, मुलगा सात्विक आणि भागीदार रावत आर्थिक गुन्हे शाखेच्या रडारवर होते. मात्र आर्थिक गुन्हे शाखेने त्यांना अद्यापपर्यंत अटक केली नव्हती.
दरम्यानच्या कालावधीत या तिघांनीही अटकपूर्व अंतरिम जामीन मिळावा यासाठी न्यायालयात स्वतंत्ररित्या जामीन अर्ज दाखल केला होता. या जामीन अर्जावर सोमवारी झालेल्या सुनावणीनंतर न्यायालयाने त्यांना अटकेपासून तात्पुरता दिलासा दिला आहे. त्यामुळे त्यांच्या अटकेचा मार्ग टळला असून ठेवीदारांसाठी ही धक्कादायक बाब असल्याचे सहकारातील जाणकारांचे मत आहे.
पंडित याची पोलीस कोठडीतून न्यायालयीन कोठडीत रवानगी होताच त्याने देखील जामीन मिळण्यासाठी लगेचच न्यायालयासमोर अर्ज केला होता. गेल्या काही दिवसांपासून या अर्जावर जिल्हा न्यायालय सुनावणी सुरू आहे. कोठडी दरम्यान चौकशीतून नेमके काय समोर आले हे अद्याप स्पष्ट झालेले नाही.
प्रकरण दुसऱ्या न्यायालयात वर्ग…
दरम्यान या प्रकरणाची सुनावणी जिल्हा न्यायाधीश सित्रे यांच्यासमोर सुरू होती. मात्र आता हे प्रकरण जिल्हा न्यायाधीश लोणे यांच्या कोर्टात वर्ग करण्यात आले आहे.
