मंगळवार, दि.३० एप्रिल
अवघ्या तेरा दिवसांवर येऊन ठेपलेल्या लोकसभा निवडणुकीत प्रचाराचा धुराळा सुरू झाला आहे. मतदारांपर्यंत पोहोचण्यासाठी उमेदवारांची त्रेधा तिरपीट उडताना दिसत आहे. त्यामुळे उमेदवार, त्यांचे समर्थक पदाधिकारी मिळेल तिथे बोलण्याची संधी सोडत नाहीत, याच पार्श्वभूमीवर विद्यमान खासदार सदाशिव लोखंडे यांना यात्रेत बोलण्यास विरोध झाल्याने त्यांना तेथून निघून जावे लागले.
शिर्डी लोकसभा मतदार संघात निवडणूक रंगात येण्यास सुरुवात झाली आहे. निवडणुकीतील प्रमुख उमेदवार प्रचारात दंग असले तरी कार्यकर्त्यांची मात्र त्यांना अद्यापही म्हणावी अशी फारशी साथ मिळत नसल्याचे दिसते. कार्यकर्त्यांच्या अपेक्षा उमेदवाराकडून पूर्ण होत नसल्याने सर्वच प्रमुख पक्षांच्या उमेदवाराबाबत हे चित्र मतदार संघात दिसत आहे. त्यामुळे शेवटच्या तेरा दिवसात सर्वप्रमुख उमेदवारांची मतदारापर्यंत पोहोचण्यासाठी चढाओढ सुरू आहे. त्यातच आता सभांचा देखील धडाका उडणार आहे.
मंगळवारी संगमनेर तालुक्यातील बोटा येथील ग्रामदैवताची यात्रा असल्याने प्रचाराची संधी सादर खासदार लोखंडे सकाळीच महायुतीतील प्रमुख पदाधिकाऱ्यांसह येथे हजर झाले होते. सुरू असलेल्या मिरवणुकीत लोखंडे सामील झाले. जल्लोषात सुरू असलेल्या या मिरवणुकीत लोखंडे थेट डीजे असलेल्या गाडीवर चढले. पाठोपाठ त्यांच्या सोबत असलेल्या राष्ट्रवादी काँग्रेसच्या (अजित पवार) जिल्हाध्यक्ष कपिल पवार यांनी बोलण्यासाठी डीजे सोबत असलेल्या यात्रेतील संयोजकांकडे माईकची मागणी केली.
मात्र गावची यात्रा असल्याचे सांगत बोलण्यासाठी माइक देणार नसल्याचे तरुणांनी सांगितले. त्यामुळे डीजेवर चढलेल्या लोखंडे यांना पुन्हा खाली उतरून तेथून निघून जावे लागले. या संबंधीचा एक व्हिडिओ समाज माध्यमात व्हायरल होताना दिसत आहे.
बघा व्हिडिओ…
