देशात पाचव्या टप्प्यातील मतदान सुरू, राज्यातील १३ जागांचा समावेश; अशा आहेत राज्यातील प्रमुख लढती

सोमवार, दि. २० मे 

देशात पाचव्या टप्प्यातील मतदानाला प्रारंभ झाला आहे. राज्यातील १३ जागांसह एकूण ४९ जागांवर आज मतदान होत आहे. आतापर्यंत देशात चार टप्प्यातील मतदान प्रक्रिया पूर्ण झाली असून आज पाचव्या टप्प्यात मतदान होत आहे. आजच्या मतदानानंतर राज्यातील सर्व जागांवरील मतदान झाल्याने मतदान प्रक्रिया संपणार आहे. शेवटचे दोन टप्पे उरले असून ४ जूनला निवडणुकीचा निकाल समोर येईल. त्यानंतर देशात कोणाची सत्ता असेल हे स्पष्ट होईल.

या राज्यात आज मतदान…

महाराष्ट्र, उत्तर प्रदेश, बिहार, पश्चिम बंगाल, ओडिशा, झारखंड आणि जम्मू काश्मीर आणि लडाख या दोन केंद्रशासित प्रदेशांमधील एकूण ४९ जागांवर मतदान होत आहे.

महाराष्ट्रात येथे सुरू आहे आज मतदान…

धुळे, दिंडोरी, नाशिक, पालघर, भिवंडी, कल्याण, ठाणे, मुंबई उत्तर, मुंबई उत्तर-पश्चिम, मुंबई उत्तर-पूर्व, मुंबई उत्तर-मध्य, मुंबई दक्षिण-मध्य आणि मुंबई दक्षिण हे लोकसभा मतदान संघात मतदान होत आहे.

राज्यातील अशा आहेत लढती….

नाशिक : हेमंत तुकाराम गोडसे (शिवसेना) विरुद्ध राजाभाऊ वाजे (शिवसेना उद्धव बाळासाहेब ठाकरे) विरुद्ध शांतीगिरी महाराज(अपक्ष) यांच्यात लढत होणार आहे.

धुळे : सुभाष रामराव भामरे (भाजप) विरुद्ध शोभा दिनेश बच्छाव (काँग्रेस) यांच्यात सरळ लढत होत आहे.

दिंडोरी : डॉ.भारती प्रवीण पवार (भाजप) यांच्या विरोधात भास्कर मुरलीधर भगरे (शरदचंद्र पवार राष्ट्रवादी) निवडणूक रिंगणात उतरले आहेत.

मुंबई उत्तर : पीयूष गोयल (भाजप) आणि काँग्रेसचे भूषण पाटील यांच्यात सरळ लढत आहे.

मुंबई उत्तर मध्य : ॲड. उज्ज्वल निकम (भाजप) यांचा सामना काँग्रेसच्या वर्षा गायकवाड यांच्याशी सरळ लढतीच्या माध्यमातून आहे.

मुंबई दक्षिण: अरविंद सावंत (शिवसेना उद्धव बाळासाहेब ठाकरे) विरुद्ध यामिनी जाधव (शिवसेना) हे आमनेसामने मैदानात उतरले आहेत.

मुंबई दक्षिण मध्य: राहुल शेवाळे (शिवसेना) अनिल देसाई (शिवसेना उद्धव बाळासाहेब ठाकरे) यांच्याशी सरळ लढत देत आहेत.

मुंबई उत्तर-पश्चिम: रवींद्र वायकर (शिवसेना) हे अमोल कीर्तिकर (शिवसेना उद्धव बाळासाहेब ठाकरे) यांच्या विरोधात समोर समोर लढत आहेत.

मुंबई ईशान्य: संजय दिना पाटील (शिवसेना उद्धव बाळासाहेब ठाकरे) हे भाजपचे उमेदवार मिहीर कोटेचा यांच्याविरुद्ध मैदानात उतरले आहेत.

कल्याण : वैशाली दरेकर-राणे (शिवसेना उद्धव बाळासाहेब ठाकरे) यांच्या विरोधात मुख्यमंत्री एकनाथ शिंदे यांचे पुत्र डॉ. श्रीकांत शिंदे (शिवसेना) लढत आहेत.

ठाणे: राजन बाबुराव विचारे (शिवसेना उद्धव बाळासाहेब ठाकरे) विरुद्ध नरेश म्हस्के (शिवसेना) यांच्यात सरळ लढत होत आहे.

भिवंडी: कपिल मोरेश्वर पाटील (भाजप) विरुद्ध सुरेश म्हात्रे (राष्ट्रवादी) यांच्यात निवडणूक रंगणार आहे.

पालघर : हेमंत सावरा (भाजप) यांची भारती कामडी (शिवसेना उद्धव बाळासाहेब ठाकरे) यांच्याशी लढत होत आहे.