गुरुवार, दि. २३ मे
इगतपुरीच्या भावली धरणात पाच जणांचा, उजनी धरणाच्या बॅक वॉटर मध्ये वादळी वाऱ्यामुळे प्रवासी बोट बुडाल्याने पाच जणांचे मृतदेह हाती आल्याची घटना ताजी असतानाच आता अहमदनगरच्या अकोले तालुक्यातील सुगावमध्ये प्रवरा नदीपात्रात बुडालेल्या दोघा तरुणांच्या शोधासाठी गेलेली एसडीआरएफ (SDRF) पथकाची बोट बुडून पथकातील तिघांचा मृत्यू झाल्याची धक्कादायक घटना समोर आली आहे.
बुडालेल्यापैकी एका तरुणासह तिघा जवानांचे मृतदेह हाती लागले आहे. तर अद्यापही दोघे सापडले नसून दोघांना रुग्णालयात दाखल केल्याची माहिती संगमनेरचे पोलीस उपअधीक्षक सोमनाथ वाघचौरे यांनी ‘महाराष्ट्र संवाद न्यूज’ला दिली आहे.
अशी आहे घटना … सागर पोपट जेडगुले (वय २५ वर्ष, रा. धुळवड ता. सिन्नर) व अर्जुन रामदास जेडगुले (वय १८ वर्षे, रा. पेमगिरी ता. संगमनेर) हे दोघे बुधवारी दुपारी दोन वाजण्याच्या सुमारास सुगावच्या पाझर तलावाजवळील नदीपात्रात आंघोळीसाठी पाण्यात उतरले होते. मात्र पात्राचा अंदाज न आल्याने ते पाण्यात बुडाले. बुडालेल्या तरुणांच्या शोधासाठी धुळ्याहून राज्य आपत्ती प्रतिसाद दलाच्या (SDRF) पथकाला बोलाविण्यात आले होते. एक स्थानिक नागरिक आणि एसडीआरएफचे (SDRF) पाच जवानांचे पथक असे सहा जण बोटीतून गेले होते. मात्र शोधासाठी गेलेली ही बोट नदीपात्रातील पाण्यात मोठा भोवरा व खड्डा असल्याने उलटून शोध पथकातील पाच जवान आणि एक स्थानिक असे सर्वजण पाण्यात पडले. यापैकी तीन जवानांचा मृत्यू झाला. पथकातील दोन जवान जखमी अवस्थेत सापडले असून त्यांच्यावर रुग्णालयात उपचार सुरू आहे. तर स्थानिक नागरिकासह बुडालेल्या तरुणांपैकी एकाचा अद्यापही शोध लागलेला नाही. प्रशासनाकडून शोधकार्य अद्यापही सुरू आहे. पोलीस उपाधीक्षक सोमनाथ वाघचौरे संगमनेर-अकोलेचे प्रांताधिकारी शैलेश हिंगे यांच्यासह वरिष्ठ अधिकारी, कर्मचारी घटनास्थळी शोधकार्य करत आहे.
अशी आहे मृत,जखमी व बेपत्ता असलेल्यांची नावे… बुडालेल्यापैकी सागर पोपट जेडगुले (वय २५ वर्ष, रा. धुळवड ता. सिन्नर) याचा मृतदेह आढळून आला आहे. तर अर्जुन रामदास जेडगुले (वय १८ वर्षे, रा. पेमगिरी ता. संगमनेर), स्थानिक नागरिक गणेश मधुकर देशमुख (वाकचौरे) वय ३८ वर्ष, रा. मनोहरपुर, अकोले यांचा शोध सुरू आहे. तर एसडीआरएफच्या पथकातील कॉन्स्टेबल पंकज पंढरीनाथ पवार व कॉन्स्टेबल अशोक हिम्मतराव पवार यांचा शोध लागला असून दोघाही जखमींवर रुग्णालयात उपचार सुरू आहे. यातील एक जण अत्यावस्त असल्याचे समजते. तर पीएसआय प्रकाश नाना शिंदे, कॉन्स्टेबल राहुल गोपीचंद पावरा व चालक वैभव सुनील वाघ या एसडीआरएफच्या जवानांचा मृतात समावेश आहे.
माजी महसूल मंत्री थोरात घटनास्थळी … दरम्यान या दुर्दैवी घटनेची माहिती मिळतात राज्याचे माजी महसूल मंत्री काँग्रेस नेते आमदार बाळासाहेब थोरात यांनी गुरुवारी सकाळीच सुगाव बुद्रुक येथे घटनास्थळी भेट देत पाहणी करत प्रशासनाला योग्य नियोजनाबाबत सूचना केल्या.
