शुक्रवार, दि. २४ मे
दूधगंगा नागरी सहकारी पतसंस्थेच्या सुमारे ८१ कोटी रुपयांच्या आर्थिक घोटाळ्यातील प्रमुख आरोपी भाऊसाहेब कुटे याला आज संगमनेरच्या जिल्हा न्यायालयाने २९ मे पर्यंत पोलीस कोठडी सुनावली. आर्थिक गुन्हे शाखेच्या चौकशीत आता या घोटाळ्याच्या अनुषंगाने काय माहिती समोर येते याकडे लक्ष लागले आहे.
दूधगंगा पतसंस्थेतील घोटाळ्याप्रकरणी २१ जणांविरुद्ध लेखापरीक्षकाने दिलेल्या फिर्यादीवरून संगमनेर शहर पोलीस ठाण्यात विविध कलमा अंतर्गत गुन्हा दाखल करण्यात आला आहे. आर्थिक स्वरूपाचा गुन्हा असल्याने अहमदनगर आर्थिक गुन्हे शाखा या गुन्ह्याचा तपास करत आहे. गुन्हा दाखल झाल्यापासून प्रमुख आरोपी असलेला कुटे पोलिसांना सापडत नव्हता. यामुळे आर्थिक गुन्हे शाखेच्या तपासावर प्रश्नचिन्ह निर्माण झाले होते.
आरोपींच्या अटकेसाठी व ठेवी परत मिळण्यासाठी ठेवीदारांनी वारंवार आंदोलने केली. मात्र आश्वासनापलीकडे ठेवीदारांच्या हाती अद्याप काही लागलेले नाही. या गुन्ह्यातील प्रमुख सूत्रधार आरोपी असलेला कुटे जिल्हा न्यायालय, औरंगाबाद खंडपीठाने जामीन नाकारून देखील सापडत नसल्याने तपास अधिकाऱ्यांबद्दल संशयाचे वातावरण निर्माण झाले होते.
दरम्यान अटकेपासून दिलासा मिळण्याचे सर्व मार्ग संपल्याने अखेर प्रमुख आरोपी असलेला कुटे तब्बल नऊ महिन्यानंतर गुरुवारी दुपारी संगमनेर शहर पोलीस ठाण्यात हजर झाला. शहर पोलिसांनी त्याला आर्थिक गुन्हे शाखेच्या ताब्यात दिले.
आर्थिक गुन्हे शाखेने कुटे याला अटक करत तपास अधिकारी पोलीस निरीक्षक रवी मगर यांनी शुक्रवारी संगमनेरच्या जिल्हा व अतिरिक्त सत्र न्यायालयात हजर केले. न्यायाधीश दिलीप घुमरे यांच्यासमोर सरकार पक्षाच्यावतीने व आरोपीच्यावतीने युक्तिवाद करण्यात आला.
आर्थिक गुन्हे शाखेच्यावतीने अतिरिक्त सरकारी वकील ॲड. मच्छिंद्र गवते यांनी या आर्थिक गुन्ह्याचे गंभीर स्वरूप, ठेवीदारांची झालेली मोठी आर्थिक फसवणूक न्यायालयाच्या निदर्शनास आणून दिली. तपास अधिकाऱ्यांनी आरोपीला ७ दिवसांची पोलीस कोठडी देण्याची मागणी केली. दोन्ही बाजूंचा युक्तिवाद ऐकल्यानंतर न्यायाधीश घुमरे यांनी आरोपीला ५ दिवसांची पोलीस कोठडी सुनावली.
