शनिवार, दि. २५ मे
पंतप्रधान घरकुल आवास योजनेअंतर्गत घरकुल मंजूर करून देण्यासाठी दहा हजार रुपयांची घेणाऱ्या ग्रामसेवक महिलेला अतिरिक्त सत्र न्यायालयाने ५ वर्षांची शिक्षा आणि २५ हजार रुपयांचा दंड ठोठावला आहे.
लाचेचे हे प्रकरण २०१७ मध्ये बारामतीच्या पंचायत समिती कार्यालयात घडले होते. पंतप्रधान घरकुल आवास योजनेतून घरकुल मंजूर करून देण्यासाठी सोनवडी-सुपेच्या (बारामती जि. पुणे) लोकसेवक ग्रामसेविका श्रीमती दिपाली जगन्नाथ कुतवळ (वय ३७ वर्ष) यांनी तक्रारदाराकडे दहा हजार रुपये लाचेची मागणी केली होती.
दहा हजार रुपयांची लाच स्वीकारताना पुणे लाचलुचपतच्या अधिकाऱ्यांनी पकडले होते. लाच लुचपतच्या तत्कालीन पोलीस निरीक्षक अर्चना दौंडकर यांनी तपास करत बारामती न्यायालयात आरोप पत्र दाखल केले होते. बारामतीच्या अतिरिक्त सत्र न्यायाधीशांसमोर या खटल्याची सुनावणी सुरू होती. शुक्रवारी न्यायाधीशांनी या संदर्भात निकाल दिला.
सहाय्यक सरकारी वकील श्रीमती कल्पना नाईक यांनी सरकार पक्षाच्यावतीने काम बघितले. आरोपी लोकसेवक दिपाली कुतवळ विरोधात न्यायालयात आरोप सिद्ध झाल्याने आरोपीला न्यायालयाने पाच वर्ष शिक्षा सुनावली असून २५ हजार रुपये दंड केला आहे. तसेच दंड न भरल्यास आणखी सहा महिने शिक्षा भोगावयाची आहे.
