सोमवार, दि. २७ मे
संगमनेरमध्ये कंटेनर चालकाने कोल्हार-घोटी राज्य मार्गावर संगमनेरनजीक बुलेटस्वारांना दिलेल्या धडकेत बुलेटवरील दोघांचाही मृत्यू झाला आहे. अपघातानंतर चालक कंटेनर घेऊन फरार झाला. याप्रकरणी संगमनेर शहर पोलिसांनी अज्ञात कंटेनर चालकाविरोधात गुन्हा दाखल केला आहे.
प्रशांत रवींद्र भुजबळ (वय ३३ वर्ष) व गोरख सयाजी पर्वत (वय ४० वर्ष, दोघे रा. निंबाळे, ता. संगमनेर) अशी अपघातातील मृतांची नावे आहेत.
रविवारी रात्री सव्वादहा वाजण्याच्या सुमारास हा अपघात झाला. अपघातातील मृतक त्यांच्या ताब्यातील बुलेट मोटरसायकलवरून (एम. एच. १४ एच. टी. ५००६) कोल्हार-घोटी राज्य मार्गाने संगमनेर-लोणी रोडने घरी जात असताना लोणी रस्त्यावर फ्लॉवर मार्केटजवळ अज्ञात कंटेनर चालकाने बुलेटस्वारांना पाठीमागून जोराची धडक दिली. अपघातातील जखमींना उपचारासाठी घुलेवाडीच्या ग्रामीण रुग्णालयात नेण्यात आले मात्र या अपघातात बुलेटवरील दोघांचाही मृत्यू झाला. तर कंटेनर चालक अपघाताची माहिती न देता निघून गेला.
याप्रकरणी सोमनाथ रवींद्र भुजबळ (रा. निंबाळे) यांच्या फिर्यादीवरून संगमनेर शहर पोलिसांनी अज्ञात कंटेनर चालकाविरुद्ध गुन्हा दाखल केला असून पोलीस उपनिरीक्षक पाटील पुढील तपास करत आहे.
