गुरुवार, २७ जून
अहमदनगर महापालिकेच्या आयुक्तांनी बांधकाम परवानगीसाठी नऊ लाख तीस हजाराची लाच मागितल्याचे समोर आले आहे. एसीबीच्या कारवाईनंतर अहमदनगर महापालिकेचे आयुक्त तथा प्रशासक डॉ. पंकज जावळे यांच्यासह त्यांच्या स्वीय सहाय्यकावर नगरमध्ये गुन्हा दाखल करण्याची प्रक्रिया सुरू आहे. दरम्यान महापालिकेतील जावळे यांचे कार्यालय एसीबीने सील केले आहे.
जालना एसीबीने ही कारवाई केली आहे. याबाबत अधिक माहिती अशी, तक्रारदार यांच्या भागीदारांसह 4k रियाल्टी या नावाने बांधकाम व्यवसाय करतात. त्यांनी अहमदनगर महानगरपालिका हद्दीतील मौजे नालेगाव येथे २२६०.२२ चौरस मीटर प्लॉट खरेदी केला आहे. सदरच्या प्लॉटवर तक्रारदार आणि त्यांचे भागीदार यांना बांधकाम करावयाचे असल्याने त्यांनी बांधकाम परवानगी मिळण्यासाठी अहमदनगर महानगरपालिकेकडे १८ मार्च २०२४ रोजी २५४५३१ या क्रमांकाने ऑनलाईन अर्ज केलेला होता.
या बांधकाम परवानगीसाठी महापालिका आयुक्त जावळे यांनी स्वीय सहाय्यक तथा लिपिक टंकलेखक श्रीधर देशपांडे यांच्यामार्फत तक्रारदाराकडे नऊ लाख तीस हजार रुपयांची लाच मागितली होते. लाच देण्याची इच्छा नसल्याने तक्रारदाराने या संदर्भात थेट जालना एसीबीकडे बुधवारी (१९जून) तक्रार केली होती.
जालना एसीबीच्या अधिकाऱ्याने तक्रारदाराच्या तक्रारीची बुधवार व गुरुवारी पडताळणी केली असता स्वीय सहाय्यक देशपांडे याने मनपा आयुक्त डॉ. पंकज जावळे यांच्याकडून बांधकाम परवानगी मिळवून देण्यासाठी पंचा समक्ष आठ लाख रुपयांची मागणी केली. तसेच पडताळणीत आयुक्त जावळे हे लाच मागणी मध्ये प्रोत्साहन देत असल्याचे निष्पन्न झाले होते.
त्यामुळे जालना एसीबीने गुरुवारीनगर मध्ये कारवाई केली. सकाळपासूनच महापालिकेतील एका अधिकाऱ्याला ताब्यात घेतल्याची चर्चा सुरू होती. अनेक अधिकाऱ्यांचे भ्रमणध्वनी बंद होते. तर दुपारी एसीबीच्या अधिकाऱ्यांनी महापालिकेतील आयुक्तांचे दालन सील केले. यामुळे महापालिकेत मोठी कारवाई झाल्याच्या चर्चेला दुजोरा मिळाला होता. डॉक्टर जावळे आणि देशपांडे यांच्यावर तोफखाना पोलीस ठाण्यात गुन्हा दाखल करण्याची प्रक्रिया सुरू होती.
छत्रपती संभाजीनगर एसीबीचे पोलीस अधीक्षक संदीप आटोळे, अपर पोलीस अधीक्षक मुकुंद आगाव यांच्या मार्गदर्शनाखाली जालना एसीबी चे पोलीस उपअधीक्षक किरण बिडवे यांच्या नेतृत्वाखाली सापळा अधिकारी पोलीस निरीक्षक शंकर मुटेकर, पोलीस अंमलदार गजानन घायवट, शिवाजी जमधडे, गणेश चेके, गणेश बुजाडे , शिवलिंग खुळे, अतिश तिडके, गजानन खरात विठ्ठल कापसे व भालचंद्र बिनोरकर यांच्या पथकाने ही कारवाई केली आहे.
