मंगळवार, २ जुलै | अनंत पांगारकर
संगमनेरमधील तीन खाद्यतेल कंपन्यातील खाद्यतेल भेसळीचे प्रकरण समोर आले असून या संदर्भात सामाजिक कार्यकर्ते, शिवसैनिक सुनील घुले यांनी सोमवारपासून प्रांताधिकारी कार्यालयाबाहेर उपोषण सुरू केले आहे. दरम्यान या पार्श्वभूमीवर अन्न आणि औषध प्रशासनाच्या अधिकाऱ्यांनी आज संगमनेरमध्ये किराणा दुकानांवर छापेमारी करत खाद्यतेलाचे नमुने ताब्यात घेतल्याची माहिती समजत आहे.
अन्न औषध प्रशासनाच्या अधिकाऱ्यांनी संगमनेर मधील बस स्थानक परिसरातील किराणा दुकान तसेच घुलेवाडी परिसरातील एका किराणा शॉपी मधून या तेल विक्रेत्यांकडून विक्रीसाठी बाजारात आलेल्या तेलाच्या नमुन्याची तपासणी सुरू केली असून उशिरापर्यंत कारवाई सुरू होती.
श्याम ऑइल मिल, भंडारी ॲग्रो आणि एस. व्ही. आसावा यांच्याकडून निर्मिती केल्या जात असलेल्या खाद्यतेलात भेसळ असल्याचा आरोप करत तसेच तेलाची पुण्यातील लॅब मध्ये तपासणी करत सर्वसामान्य जनतेच्या आरोग्याशी खेळणाऱ्या खाद्यतेल भेसळ खोरांविरोधात घुले यांनी वारंवार संबंधित विभागाकडे तक्रारी केल्या, निवेदने दिली. मात्र व्यापाऱ्यांचे प्रस्थ लक्षात घेता त्यांच्यावर कारवाईचे धाडस प्रशासनातील अधिकारी दाखवू शकले नाही. त्यामुळे घुले यांनी उपोषणाचा मार्ग अवलंबत सोमवारपासून उपोषण सुरू केले आहे.
घुले यांच्या मागणीकडे वारंवार पाठ फिरवणाऱ्या नगरच्या अन्न औषध प्रशासनाच्या अधिकाऱ्यांनी आज संगमनेरमध्ये उपोषणार्थी घुले यांची भेट घेतली. अन्नभेसळ प्रशासनाच्या अधिकाऱ्यांनी संबंधित कंपन्यांच्या मिलवर थेट कारवाई करण्याऐवजी बाजारात किराणा दुकानातून या खाद्यतेलाचे सॅम्पल ताब्यात घेतले आहे. दरम्यान अधिकाऱ्यांनी शहरात कारवाई सुरू करतात खाद्यतेल विक्रेत्यांचे धाबे दणाणले असून शहरातील बऱ्याच दुकानातून संबंधित कंपन्यांचे खाद्यतेल गायब झाल्याच्या चर्चा नागरिकांमध्ये सुरू होत्या. दरम्यान कारवाईनंतर संगमनेर मधील कोणत्या किराणा दुकानांचे तपासणी केली गेली याची माहिती रात्री उशिरा अन्न औषध प्रशासनाचे अधिकारी देणार असल्याची माहिती समोर आली आहे.
