सोमवार, ०८ जुलै
आई आणि पत्नीच्या कर्ज थकबाकीपोटी पतसंस्थेला दिलेला धनादेश न वटता परत आल्याने दाखल असलेल्या खटल्यात श्याम दिगंबर मयूर (रा. मयूर ज्वेलर्स, संगमनेर) या आरोपीला संगमनेरच्या अतिरिक्त मुख्य न्यायदंडाधिकाऱ्यांनी गुरुवारी एक वर्ष साध्या कारावासाची आणि १० लाख ६० हजार रुपये नुकसान भरपाई देण्याची शिक्षा ठोठावली.
अधिक माहिती अशी, आरोपी श्याम दिगंबर मयूर यांची आई वत्सलाबाई दिगंबर मयूर आणि पत्नी संगीता शाम मयूर यांनी संगमनेर शहरातील गृहलक्ष्मी महिला सहकारी पतसंस्थेकडून प्रत्येकी एक वर्षाच्या कालावधीसाठी २ लाख ७५ हजार रुपये कर्ज घेतले होते. या कर्जासाठी आरोपी शाम मयूर हा जामीनदार होता.
कर्जदार कर्जाची रक्कम भरण्यात अपयशी ठरल्याने ते संस्थेत थकबाकीदार झाले. त्यामुळे वारंवार मागणी केल्यानंतर आरोपीने आई आणि पत्नीच्या कर्जाचे कायदेशीर दायित्व पूर्ण करण्यासाठी त्याच्या खात्याचा एचडीएफसी बँकेचा पाच लाख तीस हजार रुपयांचा धनादेश पतसंस्थेला दिला होता. मात्र खात्यात पुरेसा निधी नसल्याच्या कारणावरून हा धनादेश न वटता परत आला. त्यामुळे तक्रारदार पतसंस्थेने आरोपीकडे पैशाची मागणी केली. यासाठी वकिलामार्फत नोटीस देखील पाठविली मात्र आरोपीने रक्कम भरली नाही.
त्यामुळे श्याम दिगंबर मयूर याच्या विरोधात संगमनेरच्या न्यायालयात निगोशिएबल इन्स्ट्रुमेंटच्या कलम १३८ अंतर्गत तक्रार दाखल करण्यात आली होती. अतिरिक्त मुख्य न्यायदंडाधिकारी जी. बी. देशमुख यांच्यासमोर या खटल्याची सुनावणी झाली. सुनावणी दरम्यान आरोपीने तो दोषी नसल्याचे सांगत फिर्यादी पतसंस्थेच्या अधिकाऱ्यांनी त्याच्या नावाचा धनादेश संगमनेरच्या वीज वितरण कंपनीच्या कार्यालयातून पत्नीकडून दबावाने नेला असल्याचा बचाव न्यायालयात केला. मात्र न्यायालयाने हा बचाव फेटाळून लावला.
सुनावणी दरम्यान फिर्यादी पतसंस्थेचे वकील ॲड. व्ही. बी. वाकचौरे आणि आरोपीचे वकील यांनी न्यायालयात विविध खटल्यांचा संदर्भ दिला. तक्रारदार पतसंस्थेच्या व्यवस्थापक सुनिता सुरेश आरोटे यांची देखील साक्ष या खटल्यात नोंदविण्यात आली. दोन्ही पक्षाच्या युक्तिवादानंतर न्यायालयाने आरोपी श्याम दिगंबर मयूर याला दोषी ठरविले.
गुरुवारी अतिरिक्त मुख्य न्यायदंडाधिकारी देशमुख यांनी या खटल्याचा निकाल दिला. त्यांनी आरोपी मयूर याला फिर्यादी पतसंस्थेला दहा लाख साठ हजार रुपये नुकसान भरपाई देण्याचे आदेश दिले. तसेच एक वर्ष साध्या कारावासाची शिक्षा सुनावली आहे. नुकसान भरपाई न दिल्यास आरोपीला आणखी तीन महिने कारावास भोगावा लागणार आहे.
