बुधवार, १० जुलै | संगमनेर
दीड वर्षाच्या चिमुकलीला शेताच्या बांधावर ठेवत चारा कापणीचे काम करणाऱ्या मातेच्या डोळ्यादेखत बिबट्याने चिमुकलीवर हल्ला चढवत तिला ठार करण्याची घटना संगमनेर तालुक्यातील नाशिक-पुणे महामार्गावरील हिवरगाव पावसा गावात बुधवारी संध्याकाळी घडली.
ओवी सचिन गडाख (रा. हिवरगाव पावसा, संगमनेर) असे बिबट्याच्या हल्ल्यात मृत्यू झालेल्या चिमुकलीचे नाव आहे. बिबट्याने चिमुकलीची मान आपल्या जबड्यात पकडत जवळच्या गिन्नी गवतात धाव घेतली. चिमुकलीचा प्रतिकार अयशस्वी ठरला. जखमी अवस्थेत चिमुकलीला रुग्णालयात दाखल करण्यात आले मात्र तत्पूर्वीच तिचा मृत्यू झाला होता. या घटनेमुळे पंचक्रोशीत दुःखद वातावरण निर्माण झाले आहे. दरम्यान वनविभागाच्या निष्काळजीपणामुळे ही घटना घडल्याचा आरोप स्थानिक नागरिकांनी करत वन विभागाच्या अधिकाऱ्यांवर सदोष मनुष्यवधाचा गुन्हा दाखल करण्याची मागणी केली आहे.
हिवरगाव पावसा गावालगत रस्त्याच्या कडेला गडाख वस्ती आहे. बुधवारी संध्याकाळी या चिमुकलीची आई तिला घेऊन घास कापण्यासाठी शेतात आली होती. चिमुकलीला शेताच्या बांधावर ठेवून ती घास कापत असतानाच जवळच दबा धरून बसलेल्या बिबट्याने अलगदपणे चिमुकलेला आपल्या जबड्यात पकडत जवळच्या गिन्नी गवतात धाव घेतली. हा प्रकार रस्त्याने जाणाऱ्या येणाऱ्या नागरिकांच्या लक्षात आल्याने त्यांनी आणि चिमुकलीच्या मातेने आरडाओरडा केला.
घटनास्थळी जमलेल्या नागरिकांनी जवळच्या गिन्नी गवतात धाव घेतल्याने बिबट्याने चिमुकलीला तेथेच सोडत पळ काढला. या चिमुकलीला तात्काळ उपचारासाठी रुग्णालयात हलविण्यात आले मात्र तिचा मृत्यू झाला होता.
