गुरुवार, ११ जुलै
संगमनेरच्या दर्शन रोटरी नेत्र रुग्णालयात जागतिक दर्जाच्या अत्याधुनिक अल्कॉन कंपनीची अमेरिकन तंत्रज्ञानाने सुसज्ज अशी मशिनरी बसविण्यात आली असून या मशीनवर मोतीबिंदू शस्त्रक्रिया व्हावी यासाठी बाहेरगावी जावे लागत असे. आता मात्र या शस्त्रक्रियेसाठी बाहेरगावी जाण्याची गरज भासणार नाही.
प्रसिद्ध उद्योजक व मालपाणी उद्योग समूहाचे प्रमुख राजेश मालपाणी यांच्या हस्ते या मशिनरीचे लोकार्पण नुकतेच करण्यात आले. यावेळी दर्शन रोटरीशी संबंधित मान्यवर उपस्थित होते.
संगमनेर-अकोले तालुक्यासह संपूर्ण जिल्ह्यात व जिल्ह्याबाहेरील रुग्णांसाठी दर्शन रुग्णालयाने आतापर्यंत अतिशय उच्च दर्जाची सेवा दिली आहे. रुग्णालयामार्फत आतापर्यंत सुमारे २७ हजार मोफत मोतिबिंदु शस्त्रक्रिया करण्यात आल्या असून याचा लाभ समाजातील गोरगरीब वर्ग, तसेच दुर्गम भागातील रुग्णांनी घेतला आहे. या मशिनवर ऑपरेशन व्हावे यासाठी आधी रुग्णांना बाहेरील जिल्ह्यांत जावे लागत होते परंतु आता त्याच दर्जाची शस्त्रक्रिया संगमनेरमध्ये होणार आहे.
नगर जिल्ह्यात अशी सुसज्ज मशिनरी रुग्णांसाठी पहिल्यांदाच उपलब्ध होणार असून या मशिनरीची किंमत सुमारे ३७ लाख रुपये असल्याची माहिती रुग्णालय ट्रस्टचे अध्यक्ष सीए संजय राठी यांनी दिली.
दिलीप मालपाणी म्हणाले, अल्कॉन कंपनीच्या या मशिनचे वैशिष्ट्य म्हणजे यामध्ये ओझल ही पेटंट टेक्नॉलॉजी वापरण्यात आली असून या मशिनद्वारे करण्यात आलेल्या शस्त्रक्रियाचा रुग्णांना तसेच डॉक्टरांना सुद्धा लाभ होणार आहे. जलद व अचूक शस्त्रक्रिया करण्यासाठी डॉक्टरांना मदत मिळणार असून शस्त्रक्रियेनंतर रुग्णांना या तंत्रज्ञानाद्वारे लवकर आराम मिळणार आहे.
संगमनेरकरांसाठी रोटरीची अमुल्य भेट, ऑपरेशन सोपे होणार… गोरगरीब रुग्णांच्या डोळ्यांची मोफत तपासणी व शस्त्रक्रिया करणाऱ्या दर्शन रोटरी नेत्र रुग्णालयात आता अत्याधुनिक मशिनरीची भर पडली आहे. रोटरी क्लब ऑफ संगमनेर या सेवाभावी संस्थेअंतर्गत हे रुग्णालय चालविले जाते. जागतिक दर्जाच्या अल्कॉन कंपनीचे अमेरिकन तंत्रज्ञानाने सुसज्ज अशी हि मशिनरी असणार आहे. – उद्योजक राजेश मालपाणी.
