रविवार, १४ जुलै
उधारीवर घेतलेल्या सोन्याच्या दागिन्यापोटी दिलेला चेक बँकेत न वठल्याने दाखल करण्यात आलेल्या खटल्यामध्ये संगमनेर न्यायालयाच्या अतिरिक्त मुख्य न्यायदंडाधिकाऱ्यांनी संदीप रंगनाथ आव्हाड या आरोपीला सहा महिने साधा कारावास आणि तक्रारदाराला ३ लाख ३८ हजार २६० रुपये नुकसान भरपाई देण्याची शिक्षा ठोठावली आहे.
समीर महाले यांचे शिवसाई ज्वेलर्स नावाने दागिन्यांचे दुकान असून संदीप आव्हाड आणि तक्रारदार समीर महाले यांच्यात असलेल्या ओळखीतून आव्हाड याने जुलै २०१७ मध्ये ५० ग्रॅमची एक सोन्याची साखळी आणि ९.३२० मिलीची एक सोन्याची अंगठी असे १,६९,१३० रुपये किमतीचे दागिने तीन महिन्यांच्या उधारीवर घेतले होते. महाले यांनी वारंवार पैशाची मागणी केल्यानंतर आरोपीने संगमनेर शाखेचा बंधन बँकेचा १,६९,१३० रुपयांचा चेक तक्रारदाराला दिला होता.
तक्रारदार फिर्यादी समीर महाले यांनी सदरचा चेक आपल्या बँक खात्यात भरला असता निधी अपुरा असल्याच्या कारणावरून तो परत आला. ही बाब तक्रारदाराने आरोपीला सांगितल्यानंतर आरोपीने दीड महिन्यानंतर सदरचा चेक पुन्हा भरण्यास सांगितले. मात्र पुन्हा चेक न वठल्याने तक्रारदाराने याबाबतची माहिती आरोपीला दिली. तरी देखील पैसे न मिळाल्याने महाले यांनी आरोपी आव्हाड याला ॲड. पी. एस. कोल्हे यांच्यामार्फत नोटीस पाठवून चेकच्या रकमेची मागणी केली. तरी देखील आरोपी आव्हाड यांनी पैसे दिले नाही.
त्यामुळे महाले यांनी ॲड. पी. एस. कोल्हे यांच्यामार्फत आरोपी संदीप आव्हाड याच्या विरोधात संगमनेर न्यायालयात चेक बाउन्स प्रकरणी खटला दाखल केला. अतिरिक्त मुख्य न्यायदंडाधिकारी डी. एच. दाभाडे यांच्यासमोर या खटल्याची सुनावणी सुरू होती.
आरोपी संदीप आव्हाड याने न्यायालयासमोर महाले यांना व्यवहारापोटी चेक दिल्याचे नाकारले. उलट भिशीच्या रकमेची परतफेड करताना सुरक्षेच्या उद्देशाने धनादेश दिल्याचे न्यायालयाला सांगितले. यासाठी दोन साक्षीदारांच्या साक्षी न्यायालयासमोर नोंदविण्यात आल्या. मात्र तोंडी विधानाखेरीज कोणतेही कागदपत्रे यासाठी दाखल करण्यात आले नव्हते. त्यामुळे न्यायालयाने बचावाचा मुद्दा फेटाळून लावला.
फिर्यादी महाले यांचे वकील पी. एस. कोल्हे आणि आरोपींच्या वकिलाच्या युक्तिवादानंतर अतिरिक्त मुख्य न्यायदंडाधिकारी डी. एच. दाभाडे यांनी आरोपी आव्हाड याला दोषी ठरवत गुरुवारी (११ जुलै) सहा महिने साधा कारावास आणि तक्रारदाराला ३ लाख ३८ हजार २६० रुपये नुकसान भरपाई देण्याची शिक्षा ठोठावली. तसेच दंडाची रक्कम न भरल्यास दोन महिने साधा कारावास आरोपीला भोगावा लागणार आहे.
