बुधवार, १७ जुलै
रस्त्यावर सार्वजनिक ठिकाणी व्यवसाय थाटून रहदारीस अडथळा निर्माण करणाऱ्या व्यावसायिकांवर संगमनेरमध्ये पोलिसांनी मोठ्या प्रमाणात गुन्हे दाखल केले आहेत. नव्याने आलेल्या भारतीय न्याय संहिता कायद्याच्या कलम २९३ अंतर्गत या कारवाया करण्यात आल्या आहे.
या संदर्भात शहर पोलीस ठाण्यात पोलीस कॉन्स्टेबल अतुल दिनकर उंडे, पोलीस हेडकॉन्स्टेबल कानिफनाथ दत्तात्रय जाधव आदींनी दिलेल्या फिर्यादीवरून संगमनेरमधील मेनरोडवर, अशोक चौक, नवीन नगर रस्त्यावर सार्वजनिक ठिकाणी रस्त्यावर हातगाडी, दुकाने लावून रहदारीस अडथळा निर्माण करणाऱ्या, येणाऱ्या जाणाऱ्या लोकांना उपद्रव होईल अशा प्रकारचे कृत्य करणाऱ्या पंधरा ते वीस व्यावसायिकांवर गुन्हे दाखल करण्यात आले. गेल्या आठवड्यात या कारवाया करण्यात आल्याचे समोर आले असले तरी रस्त्यावरील व्यावसायिकांच्या वाहतुकीला अडथळा आणण्याचे चित्र अद्यापही कायम आहे.
शहरात पेट्रोलिंग करणाऱ्या सहाय्यक पोलीस निरीक्षक विश्वास भान्सी, पोलीस हेड कॉन्स्टेबल कानिफनाथ जाधव, पोलीस कॉन्स्टेबल अतुल उंडे यांच्या पथकाने या कारवाया केल्या.
संगमनेर शहरातील सर्वच रस्त्यावर मोठ्या प्रमाणात व्यावसायिकांनी अतिक्रमणे केल्याने रस्त्याने येजा करणाऱ्या अनेकांना या व्यवसायिकांचा त्रास होतो. यातून अनेकदा छोटे मोठे अपघात देखील होतात. मात्र रस्त्यावर व्यवसाय करताना प्रमाणापेक्षा जास्त जागेवर व्यवसाय करत वारंवार अडथळा आणणाऱ्या व्यवसायिकांना पोलिसांनी वारंवार तोंडी व लेखी सूचना देऊन देखील कोणताही उपयोग होत नसल्याने पोलिसांनी थेट गुन्हे दाखल करण्याचे पाऊल उचलले आहे.
