रविवार २१ जुलै
विशेष पोलीस महानिरीक्षक दत्तात्रय कराळे यांनी शनिवारी संध्याकाळी नगर जिल्ह्यातील पोलीस अधिकाऱ्यांच्या बदल्यांचे आदेश काढले. वादग्रस्त ठरलेल्या नगर एलसीबीच्या उपनिरीक्षक सोपान गोरे यांचा समावेश असून या शाखेत मोठे फेरबदल करण्यात आले आहे. तर जिल्हा पोलीस अधीक्षकांनीदेखील प्रशासकीय बदल्यांची कार्यवाही शनिवारी सुरू केली.
शनिवारी पोलीस मुख्यालयात प्रशासकीय बदल्यांची प्रक्रिया सुरू करण्यात आली. रात्री उशिरापर्यंत ही प्रक्रिया सुरू होती दरम्यान जिल्ह्यातील कार्यकाळ संपलेल्या २१ पोलीस अधिकाऱ्यांच्या बदल्या दुसऱ्या जिल्ह्यात करण्यात आल्या आहे. खासदार निलेश लंके यांनी स्थानिक गुन्हे शाखेच्या कारभाराच्या चौकशीची मागणी मुख्यमंत्र्यांकडे केली असून या मागणीसाठी ते सोमवारपासून उपोषण करणार आहे. लंके यांच्या तक्रारीच्या अनुषंगाने अपर पोलीस अधीक्षकांमार्फत चौकशी सुरू करण्यात आली आहे. ‘महाराष्ट्र संवाद न्यूज’ने यासंदर्भात सातत्याने आवाज उठविला होता.
तर प्रशासकीय बदलीस पात्र असलेल्या ४२३ कर्मचाऱ्यांकडून पसंतीचे तीन पर्याय मागविण्यात आले होते. या कर्मचाऱ्यांच्या बदल्याची प्रक्रिया सुरू करण्यात आली असून प्रत्येक कर्मचाऱ्याला बोलावून घेऊन त्यांनी सुचविलेल्या पर्यायानुसार नियुक्ती देण्यात आली आहे. पोलीस अधीक्षक राकेश ओला, अपर पोलीस अधीक्षक प्रशांत खैरे व वैभव कलबुर्मे, पोलीस उपअधीक्षक अमोल भारती यांच्या उपस्थितीत या बदल्यांची प्रक्रिया सुरू होती.
गुन्हे शाखेतील ३३ कर्मचाऱ्यांच्या बदल्या…
वादग्रस्त ठरलेल्या स्थानिक गुन्हे शाखेतील एकोणवीस कर्मचाऱ्यांना बदलीच्या ठिकाणी कार्यमुक्त करण्यात आले आहे. तसेच १४ कर्मचाऱ्यांच्या प्रशासकीय बदल्या अन्य विभागात करण्यात आल्या असून गुन्हे शाखेतील एकूण ३३ कर्मचाऱ्यांच्या बदल्या करण्यात आल्या आहे. दरम्यान या शाखेच्या वादग्रस्त कारभारावरून सोमवारपासून अहमदनगरचे खासदार निलेश लंके उपोषण करणार आहेत. त्यांच्या उपोषणापूर्वीच पोलीस प्रशासनाने बदल्यांची प्रक्रिया सुरू केली आहे.
या अधिकाऱ्यांच्या झाल्या बदल्या…
स्थानिक गुन्हे शाखेत वादग्रस्त ठरलेले पोलीस उपनिरीक्षक सोपान गोरे यांच्यासह समाधान सोळंके, मनोज महाजन, निकिता महाले, समाधान भाटेवाल, नीरज बोकील, संतोष पगारे, राहुल सानप, अतुल बोरसे, निशस्त्र दलाचे सहाय्यक पोलीस निरीक्षक मयूर भामरे, सागर काळे, अनिल बागुल, गौतम तायडे, रवींद्र मगर, सहाय्यक पोलीस निरीक्षक रवींद्र पिंगळे, विश्वास पावरा, हेमंत भंगाळे, विवेक पवार, संभाजी पाटील, नितीन रणदिवे, प्रमोद वाघ यांच्या बदल्या जिल्ह्याबाहेर नाशिक परिक्षेत्रात करण्यात आल्या आहेत. या अधिकाऱ्यांच्या बदल्यांचे आदेश विशेष पोलीस महानिरीक्षक दत्तात्रय कराळे यांनी शनिवारी सायंकाळी काढले.
या अधिकाऱ्यांच्या झाल्या जिल्ह्यात बदल्या…
जळगाव येथून सहाय्यक निरीक्षक धरमसिंग सुंदरडे, किशोर पवार, हरीश भोये, गणेश अहिरे, संदीप परदेशी, नाशिक येथून सहाय्यक पोलीस निरीक्षक युवराज आठरे, सोमनाथ दिवटे, धुळे येथून पोलीस निरीक्षक संदीप मुरकुटे, रोशन निकम, नंदुरबार येथून प्रवीण महाले, नाशिक येथून सहाय्यक पोलीस निरीक्षक उज्वलसिंह राजपूत, जळगाव येथून संदीप हजारे या अधिकाऱ्यांच्या जिल्ह्यात बदल्या करण्यात आल्या आहे.
