मंगळवार, २३ जुलै
लाडकी बहीण योजनेच्या प्रचार व प्रसारासाठी सोमवारी पारनेरमध्ये (अहमदनगर) आलेल्या उपमुख्यमंत्री अजित पवार यांनी महिलांना पिंक रंगाची ई-रिक्षा देण्याची घोषणा केली. राज्यातील प्रमुख १७ शहरात पहिल्या टप्प्यात ही योजना राबविली जाणार असून त्यानंतर जिल्हा नियोजन विकास मंडळाद्वारे टप्प्याटप्प्याने राज्यात सर्वत्र योजना राबविण्याचा प्रयत्न राहणार असल्याचे त्यांनी सांगितले. दरम्यान लाडकी बहीण योजनेत एकत्रित कुटुंबातील जावेचाही समावेश करण्याबाबत भविष्यात विचार करण्याचे सुतोवाचही त्यांनी केले.
उपमुख्यमंत्री अजित पवार यांनी यंदाच्या राज्याच्या अर्थसंकल्पात मुख्यमंत्री माझी लाडकी बहीण योजना जाहीर केली आहे. या योजनेत दरमहा दीड हजार रुपये मिळणार आहेत. योजनेच्या प्रचार व प्रसाराची सुरुवात त्यांनी सोमवारी पारनेरमधून केली. यावेळी कृषी मंत्री धनंजय मुंडे, महिला व बालविकास मंत्री अदिती तटकरे उपस्थित होते. यावेळी महिलांनी विचारलेल्या प्रश्नांना अजितदादांनी उत्तरे दिली.
अजितदादाचा वादा…
अजितदादाचा वादा आहे, महिलांसाठीच्या योजना बंद होऊ देणार नाही. महिलांसाठी पिंक गुलाबी रंगाची ई-रिक्षा दिली जाणार असून तिला पेट्रोल डिझेलचा खर्च लागणार नाही. आपल्या घरातील थ्री पिन प्लगवर ही रिक्षा चार्ज होईल. साडेतीन लाख रुपये किमतीच्या या रिक्षासाठी एक लाख पाच हजाराचे डाऊन पेमेंट करावे लागेल. यातील दहा टक्के रक्कम म्हणजेच ३५ हजार रुपये संबंधित महिलेला भरावे लागतील राहिलेले ७० हजार रुपये राज्य शासन भरेल. उर्वरित अडीच लाखाच्या कर्जाला शासन हमी देईल. ६,२५० रुपयांचा मासिक हप्ता संबंधित महिलेला भरावा लागणार असून प्रवासी सेवेतून हे उत्पन्न तिला मिळेल. सुरुवातीला मुंबई, पुणे, नाशिक, नागपूर, छत्रपती संभाजीनगर, जळगाव अशा मोठ्या १७ शहरातून ही योजना राबविली जाईल. त्यानंतर जिल्हा नियोजन मंडळाच्या पुढाकारातून तालुकानिहाय लोकसंख्या व प्रवासी संख्या पाहून ही योजना राबविणार असल्याचे त्यांनी स्पष्ट केले.
महायुतीचे बटन दाबले तरच योजना सुरू…
यावेळी अजित पवारांनी महायुती सरकारच्या विविध योजनांची माहिती दिली. लेक लाडकी योजनेत मुलीला अठरा वर्षानंतर एक लाख एक हजार, उच्च शिक्षण घेणाऱ्या मुलींना शिष्यवृत्ती, मुला मुलींना एक वर्षाच्या नोकरीनंतर अनुभव प्रमाणपत्र, 15 लाख महिलांना लखपती दीदी केले. गॅस सिलेंडरचे अन्नपूर्णा योजना, लाडकी बहीण योजनेत दरमहा दीड हजार रुपये, महिला बचत गटांना तीस हजाराचे अनुदान अशा योजनांची त्यांनी माहिती दिली. महिलांनी विधानसभेत महायुतीचे बटन दाबले तरच या योजना सुरू राहतील असेही स्पष्ट करत त्याचा विचार आवर्जून करण्याचे आवाहन त्यांनी यावेळी केले.
