बुधवार, २४ जुलै
मराठा आरक्षण आंदोलनाचे नेते मनोज रंगे पाटील यांच्या विरोधात पुणे न्यायालयाने अटक वॉरंट काढले आहे. पुण्याच्या प्रथमवर्ग न्यायदंडाधिकारी ए. सी. बिराजदार यांच्या न्यायालयाने हे अटक वॉरंट काढले आहे.
२०१३ मध्ये जालना येथे ‘शंभुराजे’ या नाटकाचे सहा प्रयोग आयोजित करण्यात आले होते. प्रत्येक प्रयोगाला पाच लाख असे तीस लाख रुपये नाट्य निर्मात्यांना देण्याचे आयोजकांनी कबूल केले. या प्रयोगांचे पूर्ण पैसे नाट्यनिर्मात्याला देण्यात आले नाहीत. प्रयोग आयोजित करून नाट्य निर्मात्याचे पैसे बुडविल्या प्रकरणी जरांगे पाटील यांच्यासह अर्जुन प्रसाद जाधव आणि दत्ता बहिर (सर्व रा. अंबड, जालना) यांच्या विरोधात फसवणूक व अपहार केल्याप्रकरणी पुण्याच्या कोथरूड पोलीस ठाण्यात गुन्हा दाखल आहे.
धनंजय घोरपडे (रा. वारजे, पुणे) यांनी फौजदारी प्रक्रिया संहितेच्या कलम १५६(३) नुसार न्यायालयात तक्रार दाखल केली होती. त्यानंतर न्यायालयाच्या निर्देशावरून हा गुन्हा दाखल करण्यात आला होता. या प्रकरणात न्यायालयाने जरांगे पाटील यांना दोनदा समन्स बजावले होते. मात्र आंदोलनामुळे ते न्यायालयात हजर झाले नव्हते. त्यामुळे न्यायालयाने जरांगे पाटील यांच्यासह अन्य दोन आरोपींविरोधात अजामीनपात्र वॉरंट बजावले होते.
यापूर्वीही काढले होते वॉरंट…
न्यायालयीन सुनावणीला गैरहजर राहिल्या प्रकरणे जरांगे पाटील यांच्या विरोधात यापूर्वी जामीन पात्र वॉरंट बजावण्यात आले. त्यानंतर ते मे महिन्याच्या अखेरीस न्यायालयात हजर झाले. त्यावेळी न्यायालयाने जरांगे पाटील यांना ५०० रुपयांचा दंड ठोठावून पुढील सुनावणीला नियमितपणे हजर राहण्याच्या अटीवर हे वॉरंट रद्द केले. परंतु त्यानंतर देखील झालेल्या सुनावणीवेळी पुन्हा गैरहजर राहिल्याने जरांगे पाटील यांच्या विरोधात अजामीनपात्र अटक वॉरंट काढण्यात आले आहे.
