बुधवार, २४ जुलै
एलसीबीचे पोलीस निरीक्षक दिनेश आहेर आणि कर्मचाऱ्यांवर कारवाईची मागणी करत अहमदनगरचे खासदार निलेश लंके उपोषणाला बसले आहे. दरम्यान पोलीस निरीक्षकांवर कारवाई करण्याचा अधिकार मला नसून मी फक्त अहवाल पाठवू शकतो. कारवाईचा अधिकार वरिष्ठांना असल्याचे अहमदनगरचे पोलीस अधीक्षक राकेश ओला यांनी म्हटले आहे.
जिल्ह्यात वादग्रस्त ठरलेल्या एलसीबीच्या पोलीस निरीक्षक आणि कर्मचाऱ्यांवर कारवाईच्या मागणीसाठी गेल्या तीन दिवसापासून खासदार निलेश लंके यांचे उपोषण सुरू आहे. उपोषणादरम्यान खासदार लंके यांची प्रकृती खालावली असल्याची माहिती समोर येत आहे.
खासदार लंके यांच्या उपोषणा संदर्भात बोलताना पोलीस अधीक्षक ओला म्हणाले, पोलीस निरीक्षकांविरुद्ध ज्या काही तक्रारी आहेत त्या मला लेखी स्वरूपात द्याव्यात. आंदोलकांचा जर अधिकाऱ्यांवर विश्वास नसेल तर वरिष्ठ अधिकाऱ्यांकडे चौकशीची मागणी करता येईल. विना चौकशी कारवाई करण्यास ओला यांनी नकार देत आपली भूमिका स्पष्ट केली आहे.
त्यामुळे उपोषणासाठी खासदार लंके आता काय भूमिका घेतात याकडे जिल्ह्यातील नागरिकांचे लक्ष लागले आहे. लंके यांच्या उपोषणादरम्यान पोलीस खात्याविरोधात नागरिकांकडून मोठ्या संख्येने तक्रारी केल्या जात आहे.
