गुरुवार, २५ जुलै
अहमदनगर पोलीस दलातील स्थानिक गुन्हे अन्वेषण शाखेच्या (एलसीबी) भ्रष्टाचाराविरोधात कारवाईच्या मागणीसाठी उपोषणाला बसलेल्या खासदार निलेश लंके यांच्या उपोषणात काँग्रेसचे ज्येष्ठ नेते माजी मंत्री, आमदार बाळासाहेब थोरात यांनी यशस्वी मध्यस्थी घडवून आणली. त्यामुळे चौथ्या दिवशी उपोषण मागे घेण्यात आले आहे.
लंके यांनी एलसीबी विरोधात आवाज उठविल्याने नगर पोलिसांचे विविध कारनामे समोर आले होते. एलसीबीतील भ्रष्ट अधिकारी आणि कर्मचाऱ्यांच्या कारवाईवर तसेच जिल्ह्यातील अवैध धंदे बंद करण्याच्या मागणीवर ठाम असलेल्या खासदार निलेश लंके यांनी उपोषणाच्या तिसऱ्या दिवशी एलसीबीच्या भ्रष्ट कारभाराचे रेटकार्डच जाहीर करत महिन्याकाठी तब्बल ३० कोटी रुपयांची बेकायदा वसुली करणाऱ्या या शाखेच्या इज्जतीचा पुरता पंचनामा जिल्ह्यात झाला होता.
चार दिवसापासून सुरू असलेल्या या उपोषणाकडे जिल्हा पोलीस अधीक्षकांनी पाठ फिरविल्याने त्यांच्याविषयी देखील मोठे नाराजीचे वातावरण होते. अहमदनगरमध्ये आलेल्या माजी मंत्री आमदार बाळासाहेब थोरात यांनी उपोषणार्थी निलेश लंके यांची गुरुवारी उपोषणाच्या चौथ्या दिवशी भेट घेतली.
थोरात यांनी राज्याच्या पोलिस महानिरीक्षक रश्मी शुक्ला व नाशिकचे विशेष पोलीस महानिरीक्षक दत्तात्रय कराळे यांच्याशी चर्चा करत यशस्वी मार्ग काढला. पोलीस अधिकाऱ्यांकडून भ्रष्टाचारी अधिकारी कर्मचाऱ्यांच्या चौकशीचे लेखी आश्वासन मिळाल्यानंतर लंके यांनी आपले उपोषण मागे घेतले.
नेमके काय आश्वासन मिळाले…
- राज्याच्या पोलिस महानिरीक्षक रश्मी शुक्ला आणि विशेष पोलीस महानिरीक्षक दत्तात्रय कराळे यांच्याशी ज्येष्ठ नेते बाळासाहेब थोरात यांनी संपर्क साधला.
- स्थानिक गुन्हे अन्वेषण शाखेतील भ्रष्टाचाराची चौकशी करण्यासाठी विशेष समितीची स्थापना.
- विशेष पोलीस महानिरीक्षक दत्तात्रय कराळे यांच्याकडून चौकशी अधिकाऱ्यांची घोषणा.
- नाशिक ग्रामीणचे अपर पोलीस अधीक्षक आदित्य मिर्खेकर यांची चौकशी अधिकारी म्हणून नियुक्ती.
- पंधरा दिवसात करणार चौकशी.
- चौकशी अहवालानंतर दोषींवर तातडीने कारवाई करण्याचे आश्वासन.
