शुक्रवार, २६ जुलै | अनंत पांगारकर
दूधगंगा नागरी सहकारी पतसंस्थेतील सुमारे ८१ कोटी रुपयांच्या गैव्यवहारप्रकरणी न्यायालयातील तारखांना सातत्याने गैरहजर असलेल्या न्यायालयीन कोठडीतील प्रमूख आरोपीपैकी एक असलेला आरोपी, पतसंस्थेचा व्यवस्थापक भाऊसाहेब विठ्ठल गुंजाळ याला शुक्रवारी जेल प्रशासनाने न्यायालयासमोर हजर केले. त्याच्यासह अन्य पाच आरोपी देखील न्यायालयात उपस्थित होते.
तर या खटल्यातील प्रमुख आरोपी असलेल्या भाऊसाहेब कुटे याच्या विरोधातदेखील आर्थिक गुन्हे शाखेने आरोपपत्र न्यायालयात दाखल केले असून आता कुटे यालादेखील न्यायालयासमोर हजर राहावे लागणार आहे.
दूधगंगा नागरी सहकारी पतसंस्थेतील सुमारे ८१ कोटी रुपयांच्या गैरव्यवहाराने संगमनेरातील पतसंस्थांचे अर्थकारण धोक्यात आले आहे. संगमनेर शहर पोलीस ठाण्यात दूधगंगा पतसंस्थेचा चेअरमन आणि राजकीयदृष्ट्या प्रतिष्ठित असलेला असामी भाऊसाहेब कुटे याच्यासह तब्बल २१ जणांविरोधात फसवणुकीसह विविध कलमा अंतर्गत गुन्हा दाखल झाला आहे. यामागील मुख्य सूत्रधार, मास्टरमाईंड हा भाऊसाहेब कुटेच असून गेले अनेक दिवस तो फरार होता. भाऊसाहेब कुटेसह त्याच्या कुटुंबीयांचा देखील आरोपीत समावेश आहे. सर्वोच्च न्यायालयाने कुटुंबीयांना जामीन मंजूर केल्यानंतर कुटे पोलिसात हजर झाला होता.
गेले काही दिवस उपचाराच्या नावाखाली रुग्णालयात ठाण मांडून असलेल्या कुटेची रवानगी सध्या नासिक येथील मध्यवर्ती कारागृहात आहे. त्यातच आता आर्थिक गुन्हे शाखेने त्याच्या विरोधातील आरोपपत्र न्यायालयात दाखल केल्याने आता त्यालादेखील प्रत्येक तारखेला न्यायालयात उपस्थित राहावे लागणार आहे.
दरम्यान याप्रकरणी तुरुंगात असलेला पतसंस्थेचा व्यवस्थापक भाऊसाहेब गुंजाळ याला जेल प्रशासनाकडून न्यायालयीन तारखेवेळी हजर केले जात नसल्याने जिल्हा व अतिरिक्त सत्र न्यायाधीश योगेश मनाठकर यांच्या न्यायालयाने जेल प्रशासनाला त्याला तारखेवेळी हजर ठेवण्यासाठी प्रोडक्शन वॉरंट काढले होते. त्यामुळे त्याला आज जेल प्रशासनाने न्यायालयात हजर केले होते.
दरम्यान आज न्यायालयाचे कामकाज चालू शकले नसल्याने आरोपींवर आरोप निश्चितीची प्रक्रिया पुढील तारखेवेळी ८ ऑगस्टला होण्याची शक्यता आहे. यावेळी या खटल्यातील आणखी एक प्रमुख आरोपी भाऊसाहेब कुटे याला देखील आरोपपत्र दाखल झाल्याने जेल प्रशासनाला न्यायालयासमोर उपस्थित ठेवावे लागणार आहे.
याआधी सहा जणांचे व आता कुटे याच्या विरोधात आरोप पत्र दाखल झाल्याने आता या सर्वांवर आरोप निश्चित केल्यानंतर न्यायालयीन सुनावणीला सुरुवात होणार आहे. या गुन्ह्यातील काही आरोपींना न्यायालयाने अटकपूर्व जामीन मंजूर केला असून काही आरोपी फरार आहेत. आर्थिक गुन्हे शाखेचे अधिकाऱ्यांना त्यांचा देखील शोध घेऊन न्यायालयासमोर हजर करावे लागणार आहे.
