बुधवार, ३१ जुलै
घारगाव प्रकरणातील आरोपी युसुफ दादा चौघुले याच्या पोलीस कोठडीत बुधवारी ३ ऑगस्टपर्यंत वाढ करण्यात आली आहे. दरम्यान या प्रकरणातील मुख्य आरोपी शादाब रशीद तांबोळी याच्यासह कुणाल विठ्ठल शिरोळे व आयाज अजीम पठाण हे अद्यापही फरार आहेत.
फिर्यादी अल्पवयीन असल्याची माहिती असतानादेखील घटनेतील मुख्य आरोपी शादाब तांबोळी याच्यासोबत सलगी करण्यासाठी कुणाल शिरोळे, युसुफ चौगुले यांच्या मदतीने शादाब तांबोळी याने वेळोवेळी फिर्यादी मुलीचा पाठलाग करत तिला प्रेमाचे अमिष दाखवून तिच्यासोबत सलगी केली. तसेच शादाब तांबोळी व युसुफ चौघुले यांनी फिर्यादी तरुणीला फसवून मंचर येथे बोलावून घेत युसुफ चौघुले याच्या कारमधून फिर्यादीला पाण्यात गुंगीकारक औषध देऊन अर्धवट बेशुद्ध झाली असताना लग्नासाठी मंचरवरून चाकण येथे नेले. त्यानंतर तेथून दुसऱ्या गाडीतून मुंबई येथे पाठवून दिले होते.
मुंबईमध्ये आयाज पठाण याने तिला वेळोवेळी धमकावून हॉटेल, लॉजमध्ये पाठविले. तेथे आरोपी शादाब तांबोळी याने फिर्यादी तरुणीला फोटो व्हायरल करण्याची, तिला व तिच्या घरच्यांना संपवून टाकण्याची धमकी देत तिच्यावर वेळोवेळी बळजबरीने शारीरिक लैंगिक अत्याचार केले. तसेच धमकावून लग्नाच्या व धर्मांतराच्या कागदपत्रावर सह्या घेतल्या, अशा आशयाच्या फिर्यादीवरून घारगाव पोलीस ठाण्यात आरोपी शादाब रशीद तांबोळी, युसुफ दादा चौघुले, कुणाल विठ्ठल शिरोळे व आयाज अजीम पठाण या चौघांविरोधात भारतीय न्याय संहिता कायदा कलम १३७(२), ८७, १२३, ६४(२), ३५१(२),४९, ७४, ७५, ७८, ३(५) सह बालकांना लैंगिक अत्याचारापासून संरक्षण कायदा कलम ८,१२ प्रमाणे गुन्हा दाखल करण्यात आला होता. घारगाव चे पोलीस निरीक्षक संतोष खेडकर याप्रकरणी तपास करत आहे.
दरम्यान यातील आरोपी युसुफ दादा चौघुले याला २६ जुलैला अटक करण्यात आली होती. जिल्हा व अतिरिक्त सत्र न्यायाधीश दिलीप घुमरे यांच्या न्यायालयाने चौघुले याच्या कोठडीत बुधवारी पुन्हा ३ ऑगस्टपर्यंत वाढ केली आहे. अतिरिक्त सरकारी वकील मच्छिंद्र गवते यांनी सरकार पक्षाच्यावतीने न्यायालयासमोर जोरदार युक्तीवाद केला. तपासाच्या अनुषंगाने विविध बाबी अद्याप अस्पष्ट असल्याने त्या अनुषंगाने तपास करण्यासाठी गवते यांनी आरोपीच्या कोठडीत वाढ करण्याची केलेली मागणी न्यायालयाने मान्य केली.
