सोमवार, ०५ ऑगस्ट
मुख्यमंत्री माझी लाडकी बहीण योजनेचा लाभ घेण्यासाठी ‘ती’ विवाहिता पती आणि मुलासोबत बँक खात्याची केवायसी करण्यासाठी बँकेत आली. बँकेत गर्दी असल्याने नवऱ्याला मुलासाठी खाऊ आणण्यास पाठविले आणि बँकेत असे काही घडले की नवऱ्याला बायकोच्या शोधासाठी थेट पोलीस ठाण्याची पायरी चढावी लागली. पोलीस तपासात समोर आलेली धक्कादायक माहिती पाहून पोलिसांसोबत सर्वच चक्रावले.
सध्या महाराष्ट्रामध्ये मुख्यमंत्री माझी लाडकी बहीण योजनेचा मोठा गवगवा सुरू आहे. योजनेचा लाभ घेण्यासाठी बहिणींची धावाधाव सुरू आहे. अशा स्थितीत या योजनेच्या नावाखाली महिलेने आपल्या पती मुलासह बँकेत येत प्रियकरासोबत भुर्र होण्याचा प्रकार माजी मुख्यमंत्री अशोक चव्हाण यांच्या नांदेडमध्ये समोर आला आहे.
घडलं असं की, नांदेडच्या हदगाव तालुक्यातील एक महिला तालुक्याच्या बँकेत मुख्यमंत्री माझी लाडकी बहीण योजनेचा लाभ घेण्यासाठी केवायसीचे काम करण्याच्या निमित्ताने आपल्या अडीच वर्षाच्या मुलासोबत आली होती. या महिलेचा विवाह २०१७ मध्ये झाला होता. पती नोकरीला असल्याने नोकरीच्या निमित्ताने सासू-सासऱ्यांपासून ती वेगळे राहत होती. मात्र या दरम्यान तिच्या डोक्यात वेगळाच काहीतरी शिजत होत.
बँकेत केवायसी करण्याच्या बहाण्याने ती पती आणि अडीच वर्षाच्या मुलासोबत तालुक्याच्या गावी हदगावला आली.
केवायसी करण्यासाठी ती बँकेत पोहोचली मात्र बँकेत बरीच गर्दी असल्याने केवायसी करण्यासाठी वाट पाहावी लागणार होती. त्यामुळे संधी साधत महिलेने पतीला मुलासाठी खाऊ आणायला पाठवले, पती खाऊ आणायला जाताच ती बँकेतून गायब झाली. खाऊ घेऊन परतल्यानंतर पतीला बँकेत पत्नी आणि मुलगा दोघेही दिसले नाहीत. दोघेही गायब झाल्याने त्याने दोघांची बरीच शोधाशोध केली. मात्र पत्नी आणि मुलगा आढळून आल्याने अखेर त्याने हदगाव पोलीस ठाणे गाठून पत्नी आणि मुलगा बेपत्ता झाल्याची तक्रार दिली. पोलिसांनी घटनेचे गांभीर्य ओळखून तातडीने तपासाची चक्रे फिरविले आणि महिलेला शोधून काढले.
पोलिसांच्या तपासात समोर आलेली धक्कादायक माहिती बघून पोलिसांसह सर्वच चक्रावले. कारण महिलेने स्वेच्छेने आपल्या प्रियकरासोबत पळून जाण्याचा प्लॅन रचला होता. बँकेत आल्यानंतर तेथे आलेल्या प्रियकरासोबत संधी साधून ती पळून गेली होती.
