बुधवार, ०७ ऑगस्ट
भारतीय महिला कुस्तीपटू विनेश फोगटला पॅरिस ऑलिम्पिकमध्ये सुवर्णपदकासाठी अंतिम सामन्यात भाग घेण्यापूर्वीच अपात्र ठरवण्यात आले आहे.
विनेश ५० किलो वजनी गटातील अंतिम स्पर्धेतून बाहेर पडली आहे. त्यामुळे विनेशला यापुढे ऑलिम्पिकमध्ये कोणतेही पदक जिंकता येणार नाही. असे म्हटले जात आहे की सुवर्णपदकाच्या लढतीपूर्वी विनेश फोगटचे वजन ५० किलोग्रॅमपेक्षा १०० ग्रॅम जास्त होते.
मंगळवारी विनेशने प्री-क्वार्टर फायनलमध्ये जगातील नंबर वन खेळाडूचा आणि सेमीफायनलमध्ये क्युबाच्या खेळाडूचा पराभव करून फायनलमध्ये प्रवेश केला. यानंतर पॅरिस ऑलिम्पिकमधील ५० किलो वजनी गटात विनेश फोगटचे किमान रौप्य पदक निश्चित झाले.
पॅरिसमध्ये उपस्थित असलेल्या पीटीआय या वृत्तसंस्थेचे वार्ताहर अमनप्रीत सिंह यांनी दिलेल्या माहितीनुसार, विनेशचे वजन जास्त असल्याने तिला बाहेर फेकण्यात आले आहे. याबाबत भारतीय ऑलिंपिक संघटनेने खेद व्यक्त केला आहे.
विनेश फोगट मंगळवारी रात्री ऑलिम्पिकच्या अंतिम फेरीत पोहोचणारी पहिली भारतीय महिला ठरली. एका भारतीय प्रशिक्षकाने पीटीआय या वृत्तसंस्थेला सांगितले की, “आज सकाळी तिचे वजन १०० ग्रॅमने जास्त असल्याचे आढळून आले. नियमानुसार याची परवानगी नाही आणि त्यामुळे तिला अपात्र ठरवण्यात आले आहे.”
