शनिवार, १० ऑगस्ट
लोकसभा निवडणुकीवेळी प्रचारासाठी आलेल्या पंतप्रधान नरेंद्र मोदी यांना आपण शरद पवार यांच्यावर काही बोलू नये, अशी विनंती पुण्यात केली होती, पण मोदींनी प्रचार सभेत शरद पवारांचा उल्लेख ‘भटकती आत्मा’ असा केला. त्यामुळे लोकसभा निवडणुकीत त्याचा मोठा फटका महायुतीला बसला असल्याची कबुली उपमुख्यमंत्री अजित पवार यांनी दिली.
नाशिक दौऱ्यावर असलेल्या उपमुख्यमंत्री अजित पवार यांच्या उपस्थितीत छगन भुजबळ यांच्या येवला येथील कार्यालयात महायुतीच्या पदाधिकारी कार्यकर्त्यांची बैठक झाली. यावेळी महाराष्ट्रातील जागा कमी का झाल्या याबाबत चर्चा करताना अजित पवार यांनी उपस्थित त्यांना निवडणुकीवेळी घडलेला हा किस्सा सांगितला.
बैठकीत नाशिक लोकसभा मतदारसंघातील पराभवाबाबत चर्चा झाली. एका विधानसभा निवडणुकीत नाशिक जिल्ह्यातून महायुतीच्या जास्तीत जास्त जागा कशा आणता येतील याबाबत देखील या बैठकीत चर्चा करण्यात आली.
नेमकं काय म्हणाले होते पंतप्रधान पुण्याच्या सभेत… पुण्यातील सभेत पंतप्रधान नरेंद्र मोदी यांनी शरद पवारांना लक्ष्य करत त्यांचा ‘भटकती आत्मा’ असा उल्लेख केला होता. महाराष्ट्रानंतर आता देश अस्थिर करण्याचा प्रयत्न त्यांनी चालविला आहे. महाराष्ट्राला अशा “भटकती आत्मा”पासून वाचविले पाहिजे. महाराष्ट्रात महायुती मजबूत आहे, असे मोदी या सभेत म्हणाले होते.
