शनिवार, १० ऑगस्ट
मराठा आरक्षण आंदोलकांचे नेते मनोज जरांगे सोमवारी नगर शहरात शांतता रॅली काढणार असल्याने या रॅलीच्या पार्श्वभूमीवर नगर शहर व उपनगरातील शाळांना सुट्टी जाहीर करण्यात आली आहे. शिक्षण विभागाकडून तसे परिपत्रक सर्व शाळांना पाठविण्यात आले आहे.
जरांगे यांच्या शांतता रॅली वेळी होणाऱ्या गर्दीचा विचार करून विद्यार्थ्यांची गैरसोय टाळण्यासाठी शिक्षण विभागाने हा निर्णय घेतला आहे. यासंबंधीचे परिपत्रक प्राथमिक शिक्षणाधिकारी भास्कर पाटील व माध्यमिक शिक्षणाधिकारी अशोक कडूस यांनी संयुक्तपणे नगर शहर व उपनगरातील शाळांना पाठविले.
जरांगे सोमवारी पुण्याहून नगर मध्ये येत आहे. यावेळी केडगाव उपनगरात त्यांचे स्वागत करण्यात येणार असून तेथून माळीवाडा, बस स्थानक परिसरातील छत्रपती शिवाजी महाराजांच्या अश्वारूढ पुतळ्याला अभिवादन करून जरांगे यांचे शहरातून शांतता रॅली काढण्यात येणार आहे. चौपाटी कारंजावर या रॅलीची सांगता होईल.
शांतता रॅलीसाठी जिल्ह्यातून मोठ्या प्रमाणात लोक उपस्थित राहण्याची शक्यता लक्षात घेऊन सुमारे पाच हजार स्वयंसेवक या शांतता रॅलीचे नियोजन व व्यवस्थेचे काम पाहत आहे. या रॅली दरम्यान नगरमध्ये मनोज जरांगे नेमकं काय बोलणार याकडे देखील लक्ष लागले आहे.
