शनिवार, २८ सप्टेंबर
मुंबई: केंद्रीय निवडणूक आयोगाने नुकताच विधानसभा निवडणुकीच्या पार्श्वभूमीवर राज्याचा दौरा केला. या दौऱ्यात त्यांनी ११ पक्षाच्या नेत्यांबरोबर चर्चा केली. शिवाय राज्यातल्या निवडणूक तयारीचा आढावाही घेतला. राज्यात २८८ विधानसभा मतदार संघ असून निवडणुकीला जास्तीत जास्त मतदारांनी मतदान करावे यासाठी आयोगाचे प्रयत्न असल्याचे सांगत शहरी भागात होत असलेल्या कमी मतदानाबद्दल मुख्य निवडणूक आयुक्त राजीव कुमार यांनी चिंता व्यक्त केली. 
केंद्रीय निवडणूक आयोगाकडून आज पत्रकार परिषदेचे आयोजन करण्यात आले होते. यात विधानसभा निवडणुकीची घोषणा केली जाईल अशी अपेक्षा होती मात्र, पत्रकार परिषदेत निवडणुकीची घोषणा करण्यात आली नाही. निवडणुकीसंबंधी घोषणा लवकरच पत्रकार परिषदेतूनच करू असेही त्यांनी स्पष्ट केले.
राज्यात पुरुष मतदारांची संख्या ४ कोटी ९५ लाख तर महिला मतदारांची संख्याही ४ कोटी ६४ लाख आहे. तृतीयपंथी ५ हजार ९९७, तर दिव्यांग मतदारांची संख्या ६ लाख ३२ हजार आहे. विशेष म्हणजे पहिल्यांदा मतदान करणारे मतदार १९ लाख ४८ हजार आहेत, अशी माहिती देण्यात आली.
या निवडणुकीत सोशल मीडियावर लक्ष ठेवले जाणार आहे. तशा सुचना जिल्हाधिकाऱ्यांना देण्यात आल्या आहेत. खोटे व्हिडीओ पसरवले जातात. त्यावरही लक्ष ठेवण्याचे आदेश देण्यात आले आहेत. निवडणुकीत सभा स्थळावरून वाद होत असतात. त्यामुळे जो पहिला अर्ज करेल त्याला सभेचे ठिकाण द्यावे असेही सांगण्यात आल्याचं आयोगाने स्पष्ट केले. शिवाय गुन्हेगारी प्रवृत्तीचा उमेदवार असेल तर त्याची माहिती वर्तमान पत्रातून एकदा नाही तर तीन-तीन वेळा द्यावी लागेल असेही राजीव कुमार यांनी सांगितले.
लोकसभा निवडणुकी दरम्यान ४ हजार कोटीचे ड्रग्ज सापडले होते. त्यामुळे या सर्व गोष्टींवर तपास यंत्रणाचेही लक्ष रहाणार आहे. प्रचारादरम्यान जर कोणी विमान किंवा हेलिकॉप्टरने प्रवास करत असेल अशा वेळी काही तपासणी करायची असल्यास त्याचीही मुभा राहील असे ते म्हणाले.
दरम्यान पक्षीय चिन्ह वाटपाचा वाद सध्या कोर्टात असल्याने त्यावर बोलणे निवडणूक आयुक्तांनी टाळले. मतदानाच्या दिवशी प्रत्येकाला मतदान करता येईल याची काळजी जिल्हाधिकाऱ्यांनी घ्यावी अशा सुचना करण्यात आल्या आहेत. विधानसभा निवडणुकीची तारीख आणि निवडणूक किती टप्प्यात होईल हे लवकरच घोषीत केली जाईल असे त्यांनी सांगितले. त्यामुळे विधानसभेच्या निवडणुका कधी होणार याचा सस्पेन्स अजूनही कायम आहे.
