सोमवार, १४ ऑक्टोबर
मुंबई – शिवसेना (ऊबाठा) प्रमुख आणि महाराष्ट्राचे माजी मुख्यमंत्री उद्धव ठाकरे यांना हृदयाशी संबंधित समस्यांमुळे मुंबईतील एचएन रिलायन्स रुग्णालयात दाखल करण्यात आले आहे. मिळालेल्या माहितीनुसार, ६४ वर्षीय ठाकरे यांना सोमवारी सकाळी ८ च्या सुमारास गिरगाव येथील एचएन रिलायन्स रुग्णालयात दाखल करण्यात आले. जिथे त्यांची अँजिओप्लास्टी शस्त्रक्रिया करण्यात आली.
वृत्तानुसार, उद्धव ठाकरेंच्या हृदयात ब्लॉकेज आढळल्यानंतर डॉक्टरांनी त्यांच्यावर अँजिओप्लास्टी शस्त्रक्रिया केली आहे. त्यांच्या प्रकृतीवर डॉक्टरांचे पथक लक्ष ठेवून आहे. तथापि, शिवसेनेच्या (ऊबाठा) सूत्रांचे म्हणणे आहे की, माजी मुख्यमंत्र्यांना त्यांच्या मागील आरोग्य समस्यांमुळे नियमित तपासणीसाठी एचएन रिलायन्स रुग्णालयात दाखल करण्यात आले आहे. आज किंवा उद्या त्यांना रुग्णालयातून डिस्चार्ज मिळू शकतो.
२०२१ साली मानेच्या दुखण्यावरील उपचारासाठी उद्धव ठाकरे एच. एन. रिलायन्स रुग्णालयात दाखल होते. त्यांच्यावर १२ नोव्हेंबर २०२१ रोजी शस्त्रक्रिया करण्यात आली. आठवडाभराच्या विश्रांतीनंतर उद्धव ठाकरेंची फिजिओथेरेपी सुरू करण्यात आली होती. याच शस्त्रक्रीयेदरम्यान उद्धव ठाकरेंनी अनेक बैठका तसेच काही वेळेस जनतेशी मानेला पट्टा लावून संवाद साधला होता. उद्धव ठाकरेंचं हे आजारपण शिवसेनेतील बंडानंतरही राजकीय आरोप प्रत्यारोपांचा विषय ठरलं होतं.
१४ वर्षांपूर्वी उद्धव यांची झाली होती अँजिओप्लास्टी…
यापूर्वी जुलै २०१२ मध्ये उद्धव ठाकरे यांची अँजिओप्लास्टी करण्यात आली होती. त्यानंतर तपासादरम्यान त्याच्या हृदयाच्या तीन मुख्य धमन्यांमध्ये अनेक गंभीर अवरोध आढळून आले, ते दूर करण्यासाठी आठ स्टेंट टाकण्यात आले. २०१६ मध्ये शिवसेना अध्यक्षांची मुंबईतील लीलावती रुग्णालयात अँजिओग्राफी करण्यात आली होती.
