शनिवार, १९ ऑक्टोबर
संगमनेर बस स्थानकाच्या गाळ्यात असलेल्या शिर्डी लोकसभा मतदारसंघाचे खासदार भाऊसाहेब वाकचौरे यांच्या संपर्क कार्यालयाचा नाम फलक ‘महाराष्ट्र संवाद न्यूज’च्या वृत्तानंतर काढण्यात आला आहे. कापडाने झाकलेला नाम फलक वाऱ्यामुळे उघडा पडला होता तो काढून टाकल्याची माहिती प्रांताधिकारी तथा संगमनेर विधानसभा मतदारसंघाचे निवडणूक निर्णय अधिकारी शैलेश हिंगे आणि खासदारांचे स्वीय सहाय्यक प्रमोद कुलट यांनी दिली.
२० नोव्हेंबरला होणाऱ्या विधानसभा निवडणुकीसाठी राज्यभरात १५ ऑक्टोंबरपासून आदर्श आचारसंहितेची अंमलबजावणी सुरू झाली आहे. त्यामुळे संगमनेरमधील राजकीय पक्षाच्या कार्यालयांवर लावण्यात आलेले नामफलक कापडाने तात्पुरत्या स्वरूपात झाकण्यात आले आहेत. 
मात्र बस स्थानकाच्या मालकीच्या गाळ्यात खासदार भाऊसाहेब वाकचौरे यांचे संपर्क कार्यालय आहे. या कार्यालयाचा नामफलकदेखील कापडाने झाकण्यात आला होता. मात्र या फलकावरील कापड उडून गेल्याने गेल्या दोन-तीन दिवसापासून हा फलक पूर्वस्थितीत उघडा होता. तो पुन्हा झाकणे अपेक्षित असताना तसे न घडल्याने ‘महाराष्ट्र संवाद न्यूज’ने शनिवारी संध्याकाळी या संदर्भातील वृत्त वेब पोर्टलवर प्रसिद्ध करत आचारसंहितेच्या अंमलबजावणी बाबत शंका उपस्थित केली होती.
येथे वाचा आधीची बातमी…
https://maharashtrasanvadnews.com/?p=18262
दरम्यान या संदर्भात वृत्त प्रसिद्ध होताच प्रशासन तसेच संबंधितांकडून तातडीने पावले उचलण्यात आली. आणि अवघ्या अर्ध्या तासाच्या आतच सदर फ्लेक्स (कार्यालयाचे नामफलक) पूर्णत: काढून टाकण्यात आले. या संदर्भातील माहिती प्रांताधिकारी तथा निवडणूक निर्णय अधिकारी शैलेश हिंगे आणि खासदारांचे स्वीय सहाय्यक प्रमोद कुलट यांनी महाराष्ट्र संवादला दिली.
संपूर्ण बोर्ड काढून टाकला…
आचारसंहितेच्या पार्श्वभूमीवर सदरचा बोर्ड झाकण्यात आला होता. परंतु त्यावरील कापड फाटल्याने बोर्ड उघडा पडला होता. आता संपूर्ण बोर्ड काढून टाकण्यात आलेला आहे. – शैलेश हिंगे, प्रांताधिकारी तथा निवडणूक निर्णय अधिकारी, संगमनेर विधानसभा मतदारसंघ.
बोर्ड झाकलेला होता वाऱ्याने उडाला…
सदरचा बोर्ड आम्ही झाकलेला होता. तो वाऱ्याने उडाला. भिंतीला पक्का ठोकलेला असल्याने त्याला बाटल्या बांधण्यात आल्या होत्या मात्र जोराच्या वाऱ्यामुळे बाटल्या बांधलेले कापड उडून गेले आणि बोर्ड उघडा पडला. आता तो पूर्णतः काढून टाकण्यात आला आहे. – प्रमोद कुलट, स्वीय सहाय्यक संपर्क कार्यालय.
