टोल नाक्यावर पकडलेले पाच कोटी कोणाचे, एसपींनी दिली माहिती… सत्ताधारी गटाच्या या आमदाराचे नाव आले समोर

मंगळवार, २२ ऑक्टोबर
पुण्यातील खेड शिवापूर येथील टोल नाक्यावर पुणे ग्रामीण पोलिसांनी एका वाहनातून नेले जात असलेले पाच कोटी रुपये जप्त केले होते. याबाबत पुण्याचे एस पी पंकज देशमुख यांनी पत्रकारांशी संवाद साधून यासंदर्भात माहिती दिली आहे.आयकर विभाग आणि निवडणूक आयोग यांच्यासोबत मिळून ही कारवाई करण्यात आली होती. पाच कोटी रुपयांची रोकड घेऊन जाणारी एम.एच. ४५ ए.एस. २५२६ या क्रमांकाची गाडी अमोल नलावडे यांच्या मालकीची असून त्यांनी ही गाडी आपण बाळासाहेब आसबे यांना विकल्याचा दावा केला आहे. नलावडे हे मुख्यमंत्री एकनाथ शिंदे यांच्या शिवसेनेचे आमदार शहाजी बापू पाटील यांच्याशी संबंधित असल्याचे समोर आले आहे.
तसेच ज्यांच्याकडे हे पैसे सापडले ते रस्त्यांची काम करणारे बांधकाम व्यावसायिक असल्याचे सांगत आहे. तसा जबाब आहे त्यांनी आयकर विभागाला दिला आहे. हे पैसे आमचेच असल्याचे ते सांगत असून ते त्यांच्याकडे कुठून आले आणि ते पैसे घेऊन कुठे चालले होते याबाबत तपास सुरू आहे.प्राथमिक माहिती पैसे असलेली ही गाडी मुंबईवरून कोल्हापूरच्या दिशेने निघाली होती. या प्रकरणात काही राजकीय कनेक्शन आहे का या दिशेनेही सध्या पोलीस तपास करत आहे.
नाकाबंदी दरम्यान पैशाची वाहतूक करताना सापडलेल्या या गाडीतील पैशांचा ऑन कॅमेरा पंचनामा करण्यात आला. त्यानंतर हे पैसे आयकर विभागाकडे दिले असून त्यामध्ये पाचशे रुपयांच्या नोटा होत्या. मिळालेल्या नोटा बनावट नसून त्या खऱ्या होत्या तसेच यासंदर्भात काही राजकीय कनेक्शन आहे का या अनुषंगाने पोलीस तपास करत असल्याचे देशमुख यांनी म्हटले आहे.