बुधवार, २३ ऑक्टोबर
मुंबई – महाविकास आघाडीचा जागावाटपाचा तिढा काही अंशी सुटला असून त्यानंतर उद्धव ठाकरेंच्या शिवसेनेने उमेदवारांची पहिली यादी जाहीर केली आहे. पहिल्या यादीतून त्यांनी ६५ उमेदवार जाहीर केले आहेत. या यादीनुसार आदित्य ठाकरे वरळी मतदारसंघातून लढणार असून मुख्यमंत्री एकनाथ शिंदे यांच्या विरोधात केदार दिघे मैदानात उतरणार आहे.
ठाकरेंच्या शिवसेनेनं जाहीर केलेल्या यादीत काही वादग्रस्त जागांचाही समावेश आहे. यातील काही जागांवर काँग्रेसनं तर काही जागांवर अन्य छोट्या पक्षांनी दावा केलेला आहे. त्यामुळं उलटसुलट चर्चा सुरू झाली होती. महाविकास आघाडीच्या पत्रकार परिषदेत संजय राऊत यांना याबाबत प्रश्न विचारण्यात आला.
त्यावर त्या यादीत काही दुरुस्त्या आहेत. त्यात काही प्रशासकीय चुका आहेत. हे कसं झालं हे आम्ही उद्या तपासून पाहू आणि त्यावर नव्यानं चर्चा करू, असं संजय राऊत म्हणाले. आमच्या यादीत शेतकरी कामगार पक्षाशी संबंधित जागा आल्या आहेत. काही राष्ट्रवादी व काँग्रेसशी संबंधित जागा आहेत. त्यावर आम्ही नक्कीच चर्चा करू, असं राऊत यांनी सांगितलं.
महाविकास आघाडीच्या पत्रकार परिषदेत या यादीत प्रशासकीय चूक असल्याचं संजय राऊत यांनी सांगितलं. त्यामुळं ही यादी अंतिम आहे की यातील उमेदवारांच्या नावात काही बदल होणार आहे याविषयी संभ्रम निर्माण झाला आहे.
२७० जागांवर एकमत…
महाविकास आघाडीतील तिन्ही पक्षांमध्ये प्रत्येकी ८५ जागांवर पूर्ण एकमत झालं आहे. इतर छोट्या पक्षांनाही सामावून घेणारं जागावाटप पूर्ण झालेलं आहे. २७० जागांवर आमची सहमती झाली आहे. त्याची यादीही बनवण्यात आली आहे. उरलेल्या जागांवर आमच्या मित्रपक्षांसोबत चर्चा सुरू होईल. अशा पद्धतीनं महाविकास आघाडी २८८ जागा पूर्ण ताकदीनं लढेल, असं राऊत यांनी सांगितलं.
छोट्या पक्षांना १८ जागा देणार…
महाविकास आघाडीतील छोट्या पक्षांना १८ जागा दिल्या जातील असं काँग्रेसचे प्रदेशाध्यक्ष नाना पटोले यांनी यावेळी सांगितलं. मात्र, या जागांचा तपशील सांगण्यास नकार दिला. राष्ट्रवादी काँग्रेसचे प्रदेशाध्यक्ष जयंत पाटील, काँग्रेस नेते बाळासाहेब थोरात, विजय वडेट्टीवार, अनिल देशमुख यावेळी उपस्थित होते.
शिवसेनेने जाहीर केलेले उमेदवार खालील प्रमाणे… बघा यादी झूम करून
