गुरुवार, २४ ऑक्टोंबर
विधानसभा निवडणुकीची धामधूम सुरू असताना दीपावली सणाच्या पार्श्वभूमीवर संगमनेर तालुका सहकारी दूध उत्पादक व प्रक्रिया (राजहंस दूध) दूध उत्पादक, कर्मचारी आदींच्या बँक खात्यावर ३७ कोटी रुपये वर्ग केले असल्याची माहिती संघाचे अध्यक्ष रणजीतसिंह देशमुख यांनी दिली आहे.
दूध उत्पादक संस्थांनी गेल्या वर्षात पुरविलेल्या चांगल्या गुणप्रतीच्या दुधावर संघामार्फत दूध उत्पादकांना दिपावलीनिमित्त दूध दर फरक, दूधाचे पेमेंट, अनामत, कामगारांना बोनस आणि मेहनताना, व्यापारी देणे, चढ-उतार निधी आदींचा यात समावेश आहे.
देशमुख म्हणाले, माजी मंत्री आमदार बाळासाहेब थोरात यांच्या मार्गदर्शनाखाली दूध संघाची वाटचाल कायमच कौतुकास्पद राहिलेली आहे. दूध संघाची मागील वर्षाची उलाढाल ५३८.१० कोटी रूपये झाली. 
दूध संघाकडून दरवर्षी चांगल्या प्रतीच्या दूध पुरवठ्यावर दूध उत्पादकांना जास्तीत जास्त दूध दर फरक अदा करण्यात येतो. दूध संघाचे गुणवत्तेचे कामकाज व पारदर्शक कारभार यामुळे तालुक्यात ग्रामीण अर्थव्यवस्थेला बळकटी मिळाली असून दूध उत्पादकांनी सहकारावर सातत्याने विश्वास ठेवलेला आहे.
दिपावली सणानिमित्त दूध उत्पादक व कामगारांना बोनस रक्कम अदा होत असल्यामुळे दूध उत्पादक, कामगार व व्यापारी वर्गामध्ये आनंदाचे वातावरण झाले आहे. त्यामुळे तालुक्यात मोठ्या प्रमाणात आर्थिक उलाढाल होणार आहे. संगमनेर तालुक्यात सहकारमहर्षी स्व. भाऊसाहेब थोरात यानी अथक परिश्रम घेऊन सहकारी संस्था स्थापन केल्या. त्यांचे अथक प्रयत्नामुळे सहकारी संस्थांची प्रगती झाली. दूध उत्पादक सभासदांचे सातत्याने हित जोपासतांना दूध उत्पादकांना फायद्याचे ठरतील असेच निर्णय घेतले जातात.
संगमनेर दूध संघाचे दिपावलीनिमित्त वरील प्रमाणे दूध दर फरक अदा करण्याचा निर्णय माहे ऑगष्ट महिन्यात झालेल्या अधिमंडळाच्या वार्षिक सभेत व संचालक मंडळाच्या सभेत घेतलेला आहे.
तालुक्यातील प्राथमिक सहकारी दूध संस्थांना किफायतशीर दूध भाव मिळणेकामी संगमनेर दूध संघास स्वच्छ व निर्भेळ दुधाचा पुरवठा करावा असे आवाहन संघाचे कार्यकारी संचालक डॉ. सुजित खिलारी यांनी केले आहे.
