सोमवार, २८ ऑक्टोबर
विधानसभा निवडणुकीसाठी उमेदवारी अर्ज भरण्याकरिता मंगळाच्या अखेरचा दिवस आहे. उमेदवारी अर्ज भरण्यासाठी काही तासांचा अवधी उरला असल्याने अद्यापही संगमनेर विधानसभा मतदारसंघात बाळासाहेब थोरात यांच्या विरोधातील महायुतीचा उमेदवार निश्चित झालेला नाही. शेवटच्या क्षणी थोरात यांच्या विरोधातील उमेदवार विरोधकांकडून जाहीर केला जात असल्याने मतदारांपर्यंत पोहोचण्यासाठी विरोधी उमेदवाराची मोठी दमछाक होत असते. या उलट वंचित बहुजन आघाडी आणि महाराष्ट्र नवनिर्माण सेनेने उमेदवार जाहीर केले आहे.
गेल्या चार दशकांपासून बाळासाहेब थोरात या मतदारसंघाचे नेतृत्व करत आहे. त्यांच्या विरोधात विरोधकांनी अनेकदा आग पाखड करत मैदानात शड्डू ठोकले मात्र निवडणूक जिंकण्यात त्यांना अपयश आले आहे. निवडणूक लागली की विरोधकांकडून एक चेहरा निश्चित न होता अनेक जण उमेदवारीचे दावेदार राहतात. त्यांच्यापैकी कोणाला एकाला उमेदवारी मिळाल्यास उर्वरित नाराज निवडणुकीत फारसे सक्रिय राहत नाही, विरोधकांमधील मतभेद हे थोरात यांच्या कायमच पथ्यावर पडत आले आहे.
लोकसभा निवडणुकीत थोरात यांनी अहमदनगर दक्षिण मतदार संघात लक्ष घालत आपली यंत्रणा सुजय विखे यांच्या पराभवासाठी कामाला लावली होती. याचा फायदा खासदार निलेश लंके यांना होऊन ते मोठ्या मताधिक्याने विजयी झाले. थोरात यांच्या माध्यमातून निलेश लंके यांनी केलेला पराभव जिव्हारी लागल्याने माजी खासदार सुजय विखे यांच्या माध्यमातून संगमनेर विधानसभा मतदारसंघात टायगर अभी… या घोषणेने थोरात यांच्या विरोधात वातावरण निर्माण करण्यात सुजय विखे यांनी यश मिळविले होते.
मात्र धांदरफळ खुर्द येथे झालेल्या विखे यांच्या मेळाव्यात त्यांच्याच व्यासपीठावरून अध्यक्षस्थानी असलेल्या भाजप नेते वसंत देशमुख यांनी थोरात यांच्या कन्या जयश्री थोरात यांच्या विषयी केलेल्या आक्षेपार्ह वक्तव्यानंतर केवळ मतदार संघातच नव्हे तर राज्यभरात संतापाचे वातावरण निर्माण झाले. यामुळे विखे पूर्णता बॅक फूटवर गेले. गेल्या दोन-तीन दिवसांपासून संगमनेर तालुक्यातील राजकीय वातावरण जयश्री थोरात यांच्या विषयी काढलेल्या अनुद्गारामुळे तापलेले आहे.
रविवारी रात्री झालेल्या अंभोरे येथील सभेत विखे यांनी पुन्हा एकदा वातावरण बदलविण्याचा प्रयत्न केला. मात्र संगमनेरच्या जागे संदर्भात आता मतदारसंघात वेगळेच कुजबूज सुरू झाल्याने विखे यांच्या सभांचा विरोधी उमेदवाराला कितपत फायदा होईल हे याच्या काही दिवसात स्पष्ट होईल.
या मतदारसंघात विरोधी उमेदवारीचा घोळ शेवटच्या क्षणापर्यंत सर्वच निवडणुकीत दिसून आला आहे. अंतिम क्षणी विरोधी उमेदवार जाहीर केला जात असल्याने उमेदवाराला प्रचारासाठी पुरेसा वेळ मिळत नाही. यावेळी तर ही जागा महायुतीतील नेमक्या कोणत्या घटक पक्षाच्या वाटेला जाणार हेच अद्याप निश्चित नाही. उमेदवारी अर्ज दाखल करण्यासाठी काही तासांचा अवधी उरला आहे. त्यामुळे संगमनेरची ही जागा कोणत्या पक्षाकडे जाते हे निश्चित झाल्यानंतरच उमेदवार ठरेल. विरोधकांचे या मतदार संघात धनुष्यबाण राहणार की कमळ हे देखील यानंतरच स्पष्ट होईल. त्यामुळे थोरात यांच्या विरोधी उमेदवाराचा उमेदवारी अर्जही अखेरच्या दिवशी शेवटच्या क्षणी दाखल होईल.
वंचित बहुजन आघाडी, महाराष्ट्र नवनिर्माण सेनेचे उमेदवार ठरले… संगमनेर विधानसभा मतदारसंघातून सर्वप्रथम वंचित बहुजन आघाडीने आपला उमेदवार जाहीर केला. वंचित बहुजन आघाडीकडून अजीज व्होरा तर महाराष्ट्र नवनिर्माण सेनेकडून योगेश सूर्यवंशी यांना उमेदवारी जाहीर करण्यात आली आहे.
महायुतीची जागा कोणाच्या वाट्याला अद्यापही स्पष्ट नाही… भगवंतराव मोरे विरोधी उमेदवार असण्याची शक्यता
महायुतीत संगमनेरच्या जागेवर मुख्यमंत्री एकनाथ शिंदे यांच्या शिवसेनेने धावा सांगितला असला तरी अहमदनगर दक्षिणचे माजी खासदार सुजय विखे पाटील यांनी या मतदारसंघात घेतलेल्या मेळाव्याच्या माध्यमातून ते स्वतः उमेदवार असतील आणि भाजपकडे ही जागा जाईल अशी चिन्हे दिसत होती. मात्र मतदारसंघातील बदलत्या घडामोडीचा अंदाज घेता ही जागा शिंदे सेनेकडे कायम असल्याचे संकेत मिळत असून शिंदेसेनेकडून या जागेवर निवृत्त पोलीस अधिकारी भगवंतराव मोरे यांना उमेदवारी दिली जाणार असल्याच्या चर्चेने वेग पकडला आहे. असे घडल्यास निवडणूक लढविण्यासाठी तयारी केलेल्या भाजपच्या इच्छुकांचा हिरमोड होण्याची चिन्ह निर्माण झाले आहे.
