शनिवार, १७ नोव्हेंबर
शिवसेना प्रमुख बाळासाहेब ठाकरे यांचा १२ वा स्मृतीदिन आहे आहे. दरम्यान, महत्त्वाची बाब म्हणजे लोकसभेचे विरोधी पक्षनेते राहुल गांधी यांनी बाळासाहेब ठाकरे यांच्याबाबत पोस्ट लिहून आदरांजली व्यक्त केली आहे. या पोस्टवर भाजप काय प्रतिक्रिया देणार याकडे सर्वांचे लक्ष लागले आहे.
पंतप्रधान नरेंद्र मोदी मुंबईत आले असताना त्यांनी उद्धव ठाकरेंना आव्हान दिलं होतं की बाळासाहेब ठाकरेंसाठी दोन शब्द तरी राहुल गांधींकडून वदवून दाखवा. त्यामुळे राहुल गांधी यांची पोस्ट व्हायरल होत आहे.
बाळासाहेब ठाकरे यांच्या पुण्यतिथीनिमित्त देशभरातले नेतेमंडळींनी त्यांना आदरांजली वाहिली आहे. मुंबईतल्या शिवाजी पार्क या ठिकाणी असलेल्या समाधीस्थळी जाऊन शिवसेना पक्षप्रमुख उद्धव ठाकरे आणि त्यांच्या पत्नी रश्मी ठाकरे यांनी शिवाजी पार्क येथील बाळासाहेब ठाकरे यांच्या स्मारकाला पुष्पहार अर्पण करून अभिवादन केले.
शनिवारी काँग्रेस नेत्या प्रियंका गांधी महाविकास आघाडीच्या उमेदवार प्रभावती घोगरे यांच्या प्रचारासाठी शिर्डीत आल्या होत्या त्यावेळी देखील त्यांनी मोदी-शहांच्या भाषणांचा दाखला देत महाराष्ट्र ही संतांची आणि शिवरायांची भूमी आहे. मात्र शिवाजी महाराजांचा सातत्याने अपमान मोदी व भाजप सरकारने केला आहे. त्यांना महाराजांचे नाव घेण्याचा अधिकार नाही. हिंदू हृदयसम्राट बाळासाहेब ठाकरे हे या भूमीमधील आहे. मोदी यांनी दिलेले आव्हान मी स्वीकारते आणि हिंदू हृदयसम्राट बाळासाहेब ठाकरे यांचे नाव घेते. आता माझे चॅलेंज आहे की मोदी व भाजप सरकारने जातीनिहाय जनगणना करावी.
दरम्यान मोदी-शहा यांच्या आव्हानानंतर राहुल गांधी यांची प्रतिक्रिया समोर आलेली नव्हती. आज ठाकरेंच्या १२ व्या पुण्यतिथीनिमित्त गांधी यांनी पोस्ट लिहून आदरांजली वाहिली. उद्धव ठाकरे, आदित्य ठाकरे आणि संपूर्ण शिवसेना परिवाराबद्दल माझ्या संवेदना आहेत. दिवंगत बाळासाहेब ठाकरे यांच्याबद्दल राहुल यांनी सांगितलेल्या या दोन ओळी अत्यंत महत्त्वाच्या आहेत.
नेमकं काय म्हणाले होते मोदी-शहा… काही दिवसांपूर्वी पंतप्रधान नरेंद्र मोदी आणि गृहमंत्री अमित शहा यांनी राहुल गांधींना आव्हान दिलं होतं की आघाडीच्या सहकाऱ्यांना आव्हान देतो. हिंमत असेल तर युवराजच्या तोंडून बाळासाहेब ठाकरेंची थोडी स्तुती करून दाखवा. कॉंग्रेस हा असा पक्ष आहे ज्याचे ना धोरण आहे ना हेतू.
Remembering Balasaheb Thackeray ji on his 12th death anniversary. My thoughts are with Uddhav Thackeray ji, Aditya and the entire Shiv Sena family.
— Rahul Gandhi (@RahulGandhi) November 17, 2024
पोस्टमध्ये काय म्हणाले राहुल गांधी…
राहुल गांधी यांनी पोस्ट करत लिहिलं की, बाळासाहेब ठाकरे यांची आज १२ वी पुण्यतिथी आहे. यामुळे त्यांची आठवण येत आहे. माझे विचार आणि संवेदना उद्धव ठाकरे आणि आदित्य ठाकरे तसंच संपूर्ण शिवसेना कुटुंबासह आहेत. असे राहुल गांधी यांनी लिहून त्यांच्या भावना व्यक्त करत बाळासाहेब ठाकरे यांना श्रद्धांजली वाहिली आहे. त्यामुळे आता त्यांच्या या पोस्टवर भाजप काय प्रतिक्रिया देणार या कडे सर्वांचे लक्ष लागून आहे.
