शुक्रवार, २२ नोव्हेंबर – पुणे
महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात येणाऱ्या इयत्ता दहावी आणि बारावीच्या परीक्षांचे वेळापत्रक जाहीर करण्यात आले आहे. mahahsscboard.in या बोर्डाच्या अधिकृत वेबसाइटवर आज (२१ नोव्हेंबर) दहावी आणि बारावीच्या परिक्षांचे वेळापत्रक उपलब्ध करून देण्यात आले आहे.
महाराष्ट्र राज्य माध्यमिक व उच्च माध्यमिक शिक्षण मंडळातर्फे देण्यात आलेल्या माहितीनुसार, १० ची परीक्षा २१ फेब्रुवारीपासून सुरू होईल आणि १७ मार्च २०२५ रोजी संपेल. दहावीची परीक्षा सकाळी ११.०० ते दुपारी २.०० या वेळेत पहिली शिफ्ट आणि दुपारी ३ ते सायंकाळी ६ या वेळेत दुसरी शिफ्ट अशा दोन शिफ्टमध्ये होणार आहे.
इयत्ता १२ वी सामान्य, बायफोकल आणि व्होकेशनल अभ्यासक्रमांची परीक्षा ११ फेब्रुवारीपासून सुरू होईल आणि ११ मार्च २०१५ रोजी संपेल. पहिली शिफ्ट सकाळी ११.०० ते दुपारी २.०० आणि दुसरी शिफ्ट दुपारी ०३.०० ते सायंकाळी ६.०० अशा दोन शिफ्टमध्ये होणार आहे.
महाराष्ट्र दहावीची परीक्षा भाषेच्या पेपरने सुरू होईल आणि भूगोलाच्या पेपरने संपेल. बारावीच्या सामान्य आणि व्यावसायिक बोर्डाच्या परीक्षेची सुरुवात इंग्रजीच्या पेपरने होईल आणि समाजशास्त्राच्या पेपरने संपेल.
महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण अशा नऊ विभागीय मंडळामार्फत दहावी आणि बारावीची परीक्षा घेतली जाते. गेल्या वर्षी दहावीच्या परीक्षेला २३ हजार १० शाळांमधील १५ लाख ७९ हजार ३७४ विद्यार्थ्यांनी परीक्षेसाठी नोंदणी केली होती.
परंतु, मागील पाच वर्षाच्या तुलनेत यंदा परीक्षेसाठी नोंदणी करणाऱ्या विद्यार्थ्यांची संख्या कमी झाली आहे. दरम्यान, २०२२ च्या तुलनेत २०२३ मध्ये विद्यार्थ्यांची नोंदणी ६१ हजार ७०८ ने कमी झाली.
