शुक्रवार २२ नोव्हेंबर – संगमनेर
बुधवारी पार पडलेल्या विधानसभा निवडणुकीसाठी संगमनेर विधानसभा मतदारसंघाचे मतमोजणी उद्या शनिवारी (२३ नोव्हेंबर) सकाळी ८.०० वाजता सहकार महर्षी भाऊसाहेब संतुजी थोरात क्रिडासंकुल येथे होणार आहे. २१ फेऱ्यांमध्ये मतमोजणी होत असून पारदर्शक मतमोजणीसाठी प्रशासन सज्ज असल्याची माहिती संगमनेर विधानसभा मतदारसंघाचे निवडणूक निर्णय अधिकारी शैलेश हिंगे यांनी “महाराष्ट्र संवाद न्यूज”ला दिली आहे.
संगमनेर मतदार संघाचा निकाल दुपारपर्यंत अपेक्षित आहे. बुधवारी एकुण २८८ मतदान केंद्रावर शांततेत व सुरळीत मतदान प्रक्रिया पार पाडली. मतदान प्रक्रियांमध्ये कोणताही अनुचित प्रकार समोर आला नाही. १४७ मतदान केंद्रावर निवडणूक आयोगाकडून वेबकास्टिंग करण्यात आले.
यामुळे मतदान केंद्रावर मतदानासाठी लागणाऱ्या रांगा व मतदान केंद्रातील तसेच मतदान केंद्राबाहेरील कायदा व सुव्यवस्था राखण्याचे दृष्टीने उत्तम नियोजन करण्यात आले होते. संगमनेर विधानसभेसाठी २८८ मतदान केंद्रामध्ये एकूण ७५.१९% इतके मतदान झाले.
निवडणूक निर्णय अधिकारी व निवडणूक निरीक्षक (जनरल) यांचे उपस्थितीत निवडणूक लढविणाऱ्या उमेदवारासमवेत शुक्रवारी केंद्रनिहाय सकाळी ११.०० वाजता नमुना १७ अ बाबतची छाननी प्रक्रिया पुर्ण करण्यात आली. उपस्थित उमेदवार, निवडणुक प्रतिनिधी यापैकी कोणीही प्रक्रियेवर आक्षेप घेतला नाही.
निवडणूक आयोगाने संगमनेर विधानसभा मतदारसंघाची मतमोजणी प्रक्रिया पारदर्शक व त्यावर नियंत्रण करणेकामी सुशील सिंह, निवडणूक निरीक्षक (मतमोजणी) यांची नेमणुक केलेली आहे.
मतमोजणी प्रक्रियेबाबत निवडणूक निर्णय अधिकारी हिंगे यांनी दिलेल्या माहितीनुसार, मतमोजणी प्रक्रियेसाठी ईव्हीएमसाठी १४ टेबल, पोस्टल बॅलेटसाठी ९ टेबल व ETPBS साठी ५ टेबल असे एकूण २८ टेबल लावण्यात आले आहे. प्रत्येक टेबलवर १ सुक्ष्म निरीक्षक, १ पर्यवेक्षक व १ सहाय्यक असे एकुण ९५ अधिकारी कर्मचारी प्रत्यक्ष मोजणीसाठी नियुक्त केले आहे. सदर मतमोजणी प्रक्रियेत २१ फेऱ्या पार पडणार आहेत.
मतमोजणी कामी उमेदवार व त्यांचे प्रतिनिधी तसेच मिडिया सेलची व्यवस्था करण्यात आली आहे. सर्व मतमोजणी प्रक्रियेचे व्हिडिओ चित्रीकरण केले जाणार असून बंदोबस्तासाठी स्थानिक पोलीस व मध्यप्रदेश मधील सीआरपीएफच्या जवानांची नियुक्ती केली आहे. मतमोजणी केंद्रापासून २०० मीटरच्या आत अधिकृत व्यक्ती व्यतिरिक्त कोणालाही प्रवेश दिला जाणार नाही. तसेच भारतीय दंड संहिता १६३ अन्वये मतमोजणी केद्रापासून १०० मीटरच्या आत पादचारीत क्षेत्र म्हणुन घोषीत केले असल्याची माहिती दिली.
