रविवार, ०१ डिसेंबर – मुंबई
लाडक्या बहिणींच्या बळावर मोठ्या बहुमताने महायुती पुन्हा सत्तेत आली आहे. लवकरच नव्या सरकारचा शपथविधी होईल तत्पूर्वी लाडक्या बहिणींसाठी महत्त्वाची बातमी समोर आली आहे. योजनेतील प्रत्येक निकषांची आता पडताळणी होणार आहे. त्यानंतर निकषांनुसार पात्र ठरणाऱ्या लाडक्या बहिणींना राज्याचा अर्थसंकल्प सादर झाल्यावर १ एप्रिलपासून दरमहा १५०० ऐवजी २,१०० रुपये दिले जाणार आहे.
बहिणींना सहाव्या हप्त्याची प्रतीक्षा – राज्यात महायुतीला २३० पेक्षा अधिक जागांवर स्पष्ट जनादेश मिळाल्यानंतर निवडणुकीपूर्वी पाच महिने आधी सुरू केलेल्या लाडकी बहीण योजनेचा सहावा हप्ता कधी मिळतो याची प्रतीक्षा राज्यातील दोन कोटींहून अधिक लाडक्या बहिणींना लागली आहे.
६०० रुपयांची वाढ – नुकत्याच पार पडलेल्या विधानसभा निवडणुकीत लाडकी बहीण’ योजनेचे कार्ड चालल्याचे बोलले जात आहे. कारण, महायुतीने आपल्या जाहीरनाम्यात लाडक्या बहिणींना प्रतिमाह १५०० रुपयांऐवजी २,१०० रुपये देण्याचे आश्वासन दिले होते. त्यामुळे त्यांना आता त्या २१०० रुपयांची प्रतीक्षा लागली असून आगामी महिन्यापासून ६०० रुपयांची वाढ त्यात होणार असल्याने सध्या महिला खूश आहेत.
निवडणुकीपूर्वी दिले होते संकेत – लाडकी बहीण योजनेच्या मानधनात वाढ करण्याचे संकेत विधानसभा निवडणुकीपूर्वी महायुतीने दिले होते. मुख्यमंत्री लाडकी बहीण योजनेसाठी आता नवीन सरकार लाडक्या बहिणींना दरमहा २,१०० रुपये देणार आहे.
एक एप्रिलपासून पैसे मिळणार – तत्पूर्वी, योजनेतील प्रत्येक निकषांची आता पडताळणी होणार आहे. त्यानंतर निकषांनुसार पात्र ठरणाऱ्या लाडक्या बहिणींना राज्याचा अर्थसंकल्प सादर झाल्यावर १ एप्रिलपासून दरमहा १५०० ऐवजी २,१०० रुपये दिले जाणार असल्याची माहिती आहे.
खालील या निकषांची पडताळणी होणार…
- योजनेसाठी अर्ज केलेल्या महिलांचे पती आयकर भरतात का?
- लाभार्थी लाडक्या बहिणीच्या कुटुंबाकडे चारचाकी वाहन आहे का?
- एकाच कुटुंबातील दोनपेक्षा अधिक महिलांनी अर्ज केले आहेत का?
- परितक्त्या, विधवा, निराधार योजनेचा लाभ घेत असतानाही लाडकी बहीण म्हणून लाभ घेतात का?
