मंगळवार ३ डिसेंबर – संगमनेर
गेल्या काही दिवसांपासून सुरू असलेली माजी मंत्री बाळासाहेब थोरात यांच्या राष्ट्रवादी अजित पवार गटातील पक्ष प्रवेशाची चर्चा अखेर अफवा ठरली आहे. मंगळवारी थोरात यांनीच स्नेहसंवाद मेळावा घेत आपली वाटचाल स्पष्ट केली. आपल्या प्रश्नांसाठी वेळप्रसंगी रस्त्यावर उतरण्याची तयारी ठेवा, मी तुमच्यासोबत असल्याचे स्पष्ट करत थोरात यांनी दुसऱ्या पक्षात जाण्याच्या चर्चेला पूर्णविराम दिला. 
गेल्या काही दिवसांपासून संगमनेरमध्ये थोरात अजित पवार यांच्या राष्ट्रवादी काँग्रेसमध्ये प्रवेश करणार असून मंत्रिमंडळ शपथविधीवेळी त्यांना जलसंधारण खाते दिल्या जाण्याच्या चर्चा शहरात सुरू होत्या. थोरात कोठेही जाणार नाही, हे अनेकांना माहिती असताना देखील जाणीवपूर्वक अशा पद्धतीने अफवा पसरविल्या गेल्या. अखेरीस थोरात यांनी या चर्चांना पूर्णविराम दिला.
थोरात यांच्या यशोधन जनसंपर्क कार्यालयालगतच्या पटांगणामध्ये मंगळवारी झालेल्या स्नेहसंवाद मेळाव्यात थोरात यांनी आपल्या पुढील वाटचाली संदर्भातील भूमिका स्पष्ट केली. त्यामुळे थोरात यांच्या अन्य पक्षात जाण्याच्या चर्चेला पूर्णतः पूर्णविराम मिळाला आहे.
