सोमवार, ०९ डिसेंबर – संगमनेर
सात वर्षांपासून फरार असलेल्या एका गंभीर गुन्ह्यातील आरोपीला पकडण्यासाठी पोलिसांचा पाठलाग सुरू असताना रात्रीच्या वेळी अंधाराचा अंदाज न आल्याने पोलीस पथकातील एक पोलीस कर्मचारी व आरोपी विहिरीत पडल्याची घटना शुक्रवारी रात्री संगमनेर तालुक्यातील सांगवी गावामध्ये घडली.
काय होती घटना – याबाबत मिळालेल्या माहितीनुसार, जुन्या वादाच्या कारणावरून तालुक्यामध्ये २०१६ साली हाणामारी झाल्याची एक घटना घडली होती. या घटनेतील आरोपीने आपल्या मामा आणि मामीला जमिनीच्या वादातून बेदम मारहाण केली होती. त्यामुळे सदर आरोपीविरुद्ध पोलीस ठाण्यात गंभीर गुन्हा दाखल करण्यात आला होता.
फरार गुन्हेगाराचा पोलिसांना मिळाला माग – गुन्हा दाखल झाल्यानंतर अटकेच्या भीतीने या आरोपीने पलायन केले होते. घटना घडल्यापासून तो फरार होता. अधूनमधून तो आपल्या नातेवाईकांना भेटण्यासाठी संगमनेरमध्ये यायचा. या आरोपीला पकडण्यासाठी पोलिसांचा प्रयत्न सुरू होता. मोबाईलच्या लोकेशन वरून पोलिसांना त्याचा ठाव ठिकाणा लागताच त्याला अटक करण्यासाठी एक पोलीस पथक रवाना झाले.
आरोपी आणि पोलीस पडले विहिरीत – हा आरोपी ज्या ठिकाणी थांबलेला होता. त्या ठिकाणी पोलीस पथकातील कर्मचारी पोहचले. आपल्याला पकडण्यासाठी पोलीस पथक आल्याची कुणकुण लागताच या आरोपीने पोलिसाला धक्का देऊन पलायन केले. पोलीस पथकाने त्याचा पाठलाग केला. एका शेतातून आरोपी पुढे पळत होता तर पोलीस पथक मागून त्याचा पाठलाग करीत होते. हा सर्व प्रकार रात्रीच्या वेळी सुरू होता. पोलिसांपासून वाचण्यासाठी आरोपीने झाडाझुडपांमधून पळ काढण्याचा प्रयत्न केला. मात्र मधे असलेल्या अंधारामुळे विहिरीचा अंदाज न आल्याने आरोपी व त्याच्या पाठोपाठ पोलीस पथकातील एक पोलीस कर्मचारी विहिरीत पडले.
उपचारासाठी रुग्णालयात – विहिरीत पडलेल्या आरोपीला पोहता येत असल्याने त्याने लगेचच विहिरीच्या कडेचा आसरा घेतला. मात्र पोलीस कर्मचाऱ्याला पोहता येत नसल्याने पाण्यात बुडणाऱ्या पोलीस कर्मचाऱ्यांने आरडाओरडा सुरू केला. आवाजाच्या दिशेने धावलेल्या पोलिसांना आरोपी आणि पोलीस कर्मचारी विहिरीत पडल्याचे दिसून आले. त्यांनी तातडीने काही ग्रामस्थांच्या मदतीने दोघांनाही विहिरीतून वर काढले. व दोघांनाही उपचारासाठी रुग्णालयात दाखल करण्यात आले.
अधिकाऱ्यांकडून दुजोरा – याबाबत संगमनेर तालुका पोलीस ठाण्याचे पोलीस निरीक्षक देविदास ढुमने यांच्याशी संपर्क साधला असता, आपण रजेवर असून या घटनेची आपल्याला कल्पना नसल्याचे त्यांनी सांगितले. तर अन्य वरिष्ठ पोलीस अधिकाऱ्यांनी मात्र या घटनेला दुजोरा दिला असून विहिरीत पडलेला पोलीस कर्मचारी व आरोपी शहरातील रुग्णालयात उपचार घेत असल्याचे त्यांनी सांगितले.
