सोमवार ९ डिसेंबर – अहिल्यानगर
गेल्या काही दिवसांपासून संगमनेरमध्ये धूम स्टाईलने दुचाकीवरून येत महिलांच्या गळ्यातील दागिने ओरबाडून पळविण्याचे प्रकार सर्रासपणे सुरू आहे. दागिने पळविणाऱ्या अशाच एका टोळीला पकडण्यात अहिल्यानगर गुन्हे शाखेच्या पथकाला यश आले असून पथकाने टोळीतील चार जणांना अटक केली. तर दोघे अद्याप फरार आहेत. या टोळीकडून संगमनेरमधील आठ आणि लोणी मधील एका गुन्ह्याची उकल करण्यात पोलिसांना यश आले आहे.
हे आहेत आरोपी – पोलिसांनी अटक केलेल्या आरोपी मध्ये मयूर संजय ब्राह्मणे (वय २२, रा. चर्चजवळ, वेताळबाबा चौक, लोणी, ता. राहता जि. अहिल्यानगर), निखिल सुरेश भुजबळ (वय २०, रा. गिरीम, ता. दौंड, जि. पुणे, हल्ली रा. भाने वस्ती, हसनापूर रोड, लोणी, ता. राहता, जि. अहिल्यानगर), दीप भटू सातपुते (वय २२ रा. रणछोडजी सोसायटी, कतारग्राम सूरत, गुजरात, हल्ली रा. भाने वस्ती, हसनापूर रोड, लोणी, ता. राहता, जि. अहिल्यानगर) व अभिषेक बाळासाहेब जाधव (वय २२, रा. बाभळेश्वर, ता. राहता, जि. अहिल्यानगर) अशी अटक केलेल्यांची नावे असून संदीप पोपट कदम, (रा. मानोरी, ता. राहुरी, जि. अहिल्यानगर) व बल्ली उर्फ बलीराम रामचंद्र यादव, रा. श्रीरामपूर, जि. अहिल्यानगर) अशी फरार आरोपींची नावे आहे.
एलसीबीला तपासाचे दिले होते आदेश – संगमनेरमध्ये सातत्याने महिलांच्या गळ्यातील दागिने लंपास करण्याच्या घटना घडत आहे. या पार्श्वभूमीवर जिल्हा पोलीस अधीक्षकांनी अहिल्यानगरच्या स्थानिक गुन्हे शाखेला या गावांच्या समांतर तपास करत गुन्हा उघडकीस आणण्याबाबत आदेश दिले होते. त्यामुळे एलसीबीचे पोलीस निरीक्षक दिनेश आहेर यांनी यासाठी पोलीस उपनिरीक्षक तुषार धाकराव, पोलीस आमदार मनोज गोसावी, अमृत आढाव, गणेश भिंगारदे, फुरकान शेख, संतोष खैरे, बाळासाहेब गुंजाळ, रमिझराजा अत्तार, रोहित येमुल, सागर ससाने, जालिंदर माने, रवींद्र घुंगासे, मेघराज कोल्हे, भाग्यश्री भिटे, चंद्रकांत कुसळकर व अरुण मोरे यांच्या पथकाला दागिने चोरीच्या गुन्ह्यांची उकल करण्याचे आदेश दिले.
पथक आरोपीपर्यंत पोहोचले – पथकाने घटनास्थळी भेट देऊन, आजूबाजूचे सीसीटीव्ही फुटेज तपासले, तांत्रिक विश्लेषणाच्या आधारे पोलीस पथक मयूर संजय ब्राह्मणे यांच्यापर्यंत पोहोचले असता त्याने आपल्या सहकाऱ्यांसह दागिने पळविण्याचे गुन्हे केल्याची कबुली दिली. पोलिसांनी त्याच्यासह अन्य आरोपींना अटक केली आहे तर दोघे अद्याप फरार आहे. आरोपींना संगमनेर पोलिसांच्या ताब्यात घेण्यात आले आहे.
लोणी येथील सराफाला दागिने विकले – आरोपींनी संगमनेर मधील आठ आणि लोणी येथील एका अशा नऊ ठिकाणी पल्सर आणि युनिकॉर्न मोटरसायकलवरून संगमनेर शहर व लोणी येथे गुन्हे केल्याची कबुली दिली असून चोरीचे दागिने हे लोणी येथील सराफाला विकले असल्याचे सांगितले आहे.
